Umræðan um matarsóun hefur verið töluverð undanfarið og það er auðvitað gott að komast hjá því að henda mat og koma þannig í veg fyrir matarsóun. En í viðleitni okkar til að draga úr matarsóun má ekki gleyma að sumar tegundir matar er ekki ráðlegt að hita upp oftar en einu sinni.
Flestar matartegundir þola vel að fara aftur í pottinn eða örbylgjuofninn en það eru einnig algengar tegundir sem ekki er ráðlegt að hita upp aftur. Independent birti lista yfir nokkrar matarregundir sem forðast ætti að hita upp og er hann byggður á lista evrópska matarupplýsinga ráðsins, European Food Information Council.
Ef kjúklingur og annar fiðurfénaður er hitaður upp er hætta á að salmonella nái sér á strik. Sérstaklega ef hann er hitaður í örbylgjuofni því þá hitnar maturinn ekki jafnt sem hefur í för með sér að sumir hlutar hans hitna hraðar en aðrir. Önnur ástæða er að í kjúklingi er meira af prótínum en í rauðu kjöti og við upphitun brotna prótínin niður á mismunandi hátt og það getur valdið magaverkjum.
Vandinn með upphitun hrísgrjóna felst ekki í hituninni sjálfri. Það mikilvægasta er að grjónin hafi ekki verið látin standa uppi á borði við stofuhita áður en þau kólnuðu. Ef það gerist fara bakteríur á fleygiferð í pottinum og ná að taka á sig mynd og geta valdið matareitrun þótt að grjónin séu hituð upp á nýjan leik.
Það sama á nokkurn veginn við kartöflur og hrísgrjón. Ef þær eru látnar standa á borðinu er hætt við að baktería, sem heitir Clostridium botolinum, fari að vaxa í þeim. Þessi baktería getur framleitt mjög hættulegt eiturefni sem veldur matareitrun. Hættan á þessu er sérstaklega mikil ef kartöflunum er pakkað inn í álpappír og súrefni nær ekki að leika um þær. Þessar bakteríur drepast ekki endilega þegar kartöflurnar eru hitaðar upp að nýju.
Sveppir innihalda prótín sem geta brotnað hratt niður af völdum ensíma og örvera. Ef þeir eru ekki geymdir á viðeigandi hátt verða þeir fljótt lélegir að gæðum og geta valdið magaverkjum. Forðast á að hita sveppi ef 24 klukkustundir eða meira eru liðnar síðan þeir voru hitaðir í fyrsta sinn.
Spínat og annað grænmeti með lauf innihalda mikið magn nítrats, sem er í sjálfu sér hættulaust. Vandinn er hins vegar að þegar nítrat breytist í nítrít og nítrósamín getur það orðið hættulegt. Slík eitrun getur haft áhrif á getu blóðsins til að flytja súrefni og er sérstaklega hættuleg fyrir börn.
