Ein af matvörunum sem öskrar á sumar er klárlega vatnsmelóna. Safarík, fersk og dásamlega bragðgóð. Vatnsmelóna hentar líka í ýmislegt – allt frá salötum til drykkja.
Á vefsíðunni Taste of Home er farið vel yfir hvernig á að velja vatnsmelónu, en helstu mistökin sem fólk gerir í matvöruversluninni er einfaldlega að taka ekki vatnsmelónuna upp og skoða hana.
Vatnsmelóna ætti að vera 92% vatn þannig að þyngri vatnsmelóna er safaríkari og dásamlegri. Því er mælt með að neytendur taki upp nokkrar vatnsmelónur til að finna hve þungar þær eru og alltaf velja þá þyngstu því hún er safaríkust.
Þá er einnig hægt að athuga hvort að rákirnar í berkinum séu dökkgrænar, hvort það séu gulir blettir á melónunni og hvort það heyrist holur hljómur þegar að bankað er í hana til að sjá hvort hún sé þroskuð og tilbúin til áts.