„Við ætluðum að opna 15. febrúar en það verður ekki fyrr en í lok mánaðarins, það tekur allt lengri tíma en áætlað var,“ segir Steingerður Þorgilsdóttir, einn eigenda Mathallar Höfða í samtali við Morgunblaðið. Mathöllin opnar í lok febrúar að Bíldshöfða 9 í Reykjavík. Upphaflega var auglýst að höllin myndi opna í desember á síðasta ári.
Steingerður á mexíkóska veitingastaðinn Culiacan ásamt Sólveigu Guðmundsdóttur. Sá staður verður í Mathöllinni sem og Svangi Mangi sem þær Steingerður og Sólveig munu reka, en á staðnum verður boðið upp á íslenskan heimilismat. Brugghúsið Beljandi frá Breiðdalsvík verður hluti af Svanga Magna og tekur við þeim bás þegar veitingastaðurinn lokar á kvöldin.
Aðrir staðir sem verða í mathöllinni eru Gastro Truck, Wok On og Indian Grill, sem og staðurinn Hipstur, þar sem boðið verður upp á skandinavíska stemningu – smurbrauð, morgundjúsa og ýmsa hollustu- og grænmetisrétti. Þá er einnig verið að ganga frá samningum við Íslensku flatbökuna.
„Það verður eitthvað í gangi allan daginn hjá okkur. Þú getur komið og fengið þér morgundjús eða kaffi þegar þú ferð á heilsugæsluna við hliðina á morgnana. Svo verður bakkelsi í kaffitímanum, þetta eru ekki eingöngu matartímarnir,“ segir Steingerður.