Leyniupptökurnar sem DV hefur undir höndum hafa vakið mikinn usla síðan fyrstu fréttir upp úr þeim voru birtar á vef DV seinnipartinn í gær. Á upptökunum heyrast nokkrir þingmenn Miðflokksins og Flokks fólksins tala tæpitungulaust um aðra stjórnmálamenn og -konur. Þar á meðal er Gunnar Bragi Sveinsson sem lét óviðurkvæmileg ummæli falla um tónlistarmanninn Friðrik Ómar.
„Geir slapp í gegnum þetta eins og smjör á smokknum hjá honum þarna Friðriki Ómari,“ sagði hann og vísaði í það þegar Geir H. Haarde var skipaður sendiherra í Washington.
Gunnar Bragi mætti í Morgunútvarp Rásar 2 í morgun og sagðist hafa beðið Friðrik Ómar afsökunar.
„Það er bara hræðilegt. Ég hef ekki símann hjá Friðriki þannig að ég sendi honum skilaboð á Facebook fyrstur allra til að biðjast afsökunar. Friðrik Ómar er nú einn af þessum sem ég og mín fjölskylda reynum nú helst alltaf að fara á tónleika hjá. Maður ber svo mikla virðingu fyrir honum sem listamanni og manneskju.“
Þegar fréttir af leyniupptökunum bárust seint í gær brá Friðrik Ómar hins vegar á leik á Instagram-síðu sinni og sneri óviðeigandi orðum Gunnars Braga upp í grín. Söngvarinn tók sig til, bræddi smjör í potti og prófaði að steikja smokk upp úr smjörinu.
Í morgun mætti söngvarinn síðan á útvarpsstöðina K100 og virtist taka þessum orðum sem féllu í ölæði létt. Talaði hann meðal annars um þessa smokkatilraun sína og fannst skrýtið að þingmaðurinn gerði ráð fyrir að hann notaði smokka, þar sem styttra væri síðan hann notaði smjör en smokk.
Hann tók það samt skýrt fram í útvarpsviðtalinu að honum þætti orðræða þingmannsins niðrandi í garð samkynhneigðra, þó hann tæki hana ekki persónulega til sín, enda öllu vanur. Hann bætti við að þessi orðræða væri alls ekki til fyrirmyndar og gæfi afar slæm skilaboð til ungs, hinsegin fólks sem á eftir að koma út úr skápnum.
