Bolludagurinn er í dag og Ragga nagli segir réttilega enga ástæðu til að sitja út í horni með sorg og sút, maulandi gulrót og taka ekki þátt í gleðinni. Á heimasíðu sinni gefur hún hugmynd að hollum og horuðum bolludagbollum fyrir þá sem eru að passa línurnar eða þá sem kjósa af öðrum ástæðum að úða ekki allar æðar stútfullar af sykri og smjöri þennan mánudag í febrúar.
Horaðar bolludagsbollur
4 bollur
1 dl hreint skyr
1 egg
1 tsk lyftiduft
1/2 tsk kardimommudropar
2 msk NOW erythritol
3/4 dl NOW möndluhveiti
1/4 dl Dr. Goerg kókoshnetuhveiti
1 msk NOW psyllium husk
Aðferð:
1) stilla ofninn á 200°C
2) hræra saman skyri, eggi, kardimommu, erythritol og í lokin hveiti og Husk
3) móta 4 bollur. Leggja á bökunarpappír og baka í 10-15 mínútur
Fylling
250g kotasæla
1 msk Isola möndlumjólk
1 msk NOW erythritol eða Sugarless Sugar
1/2 tsk vanilluduft
Aðferð: Hræra saman með töfrasprota þar til allt orðið slétt og fellt.
Þegar bollurnar eru orðnar kaldar viðkomu skellirðu fyllingunni inn í og stráir Sukrinmelis yfir lokið á bollunni.
Þá er ekkert eftir nema sökkva tanngarðinum í herlegheitin og sleikja hvítt gumsið af kinninni.
