Krakkaklúbburinn Krummi hóf göngu sína á Listasafni Íslands haustið 2018. Krakkaklúbburinn stendur fyrir fjölbreyttri dagskrá í hverjum mánuði þar sem börnum og fjölskyldum er boðið að fræðast um listaverkin í safneign Listasafns Íslands, skapa list og leika sér í nærandi umhverfi. Starfið er fyrir börn á öllum aldri og er þátttakendum að kostnaðarlausu. Markmiðið er meðal annars að fólk gangi að fjölbreyttri og vandaðri starfsemi fyrir börn og fjölskyldur þeirra í Listasafni Íslands.

Metnaðarfull dagskrá
Tenging við sýningar og starfsemi safnsins er ávallt höfð að leiðarljósi við dagskrárgerð Krakkaklúbbsins Krumma. Dagskráin er metnaðarfull og við leggjum mikið upp úr fjölbreytileika og viðburðum þar sem allir geta tekið þátt, börn og fullorðnir. Viðbrögðin hafa ekki látið á sér standa og Krakkaklúbburinn Krummi fer sífellt stækkandi. „Við höfum fundið fyrir mikilli eftirspurn eftir vönduðu barnastarfi á safninu okkar. Dagskráin er gefin út nokkra mánuði fram í tímann þannig að fjölskyldur geti skipulagt tíma sinn með góðum fyrirvara. Viðburðirnir eru endurteknir tvisvar í mánuði þannig að sem flestir geti notið góðs af,“ segir Ragnheiður Vignisdóttir, verkefnastjóri viðburða og fræðslu og sér hún einnig um Krakkaklúbbinn.

„Tvisvar sinnum í mánuði fyllist Listasafn Íslands af lífi þar sem börnin koma með foreldrum sínum, systkinum, ömmum og öfum í heimsókn og njóta samverunnar við hvert annað og skemmtilega starfsins sem hér er skipulagt í Krakkaklúbbnum Krumma. Listaverkin koma nefnilega á óvart og við erum alltaf að uppgötva eitthvað nýtt!“

Silkiþrykksmiðja

Dæmi um viðburði sem Krakkaklúbburinn hefur staðið fyrir síðasta árið eru tónleikar, grafíksmiðjur, ritsmiðjur, fræðsla um miðaldahandrit, jólakortagerð, galdrasýning, landakortasmiðja, teiknismiðja með teiknikennurum og núna í apríl er silkiþrykksmiðja á dagskrá í tengslum við sýninguna Fjársjóður þjóðar. Hægt verður að koma með bol að heiman til að fá prentaða mynd á eða fá pappír á safninu og skapa sitt eigið silkiþrykk.

Næsta silkiþrykksmiðja verður á dagskrá laugardaginn 27. apríl kl. 14–16 í Listasafni Íslands.

Nánari upplýsingar um viðburði safnsins má nálgast á listasafn.is

Listasafn Íslands er staðsett að Fríkirkjuvegi 7, 101 Reykjavík.

Sími: 515-9600

Fylgstu með á Facebook: Listasafn Íslands og Instagram: Listasafn Íslands