55 ára karlmaður, Grétar Þór Grétarsson hefur verið ákærður fyrir kynferðisbrot. Grétar Þór er vel þekktur á meðal aðdáenda Elvis Presley hér á landi. Hefur hann meðal annars troðið upp á skemmtikvöldum og viðburðum tengdum lögum kóngsins. Notast hann við sviðsnafnið Elvis Grétar.
Samkvæmt heimildum DV eru brotaþolarnir að minnsta kosti þrír talsins. Konurnar eiga allar við þroskaskerðingu að stríða og þekkjast innbyrðis. Samkvæmt heimildum braut Grétar Þór á tveimur kvennanna saman. Málið verður þingfest í Héraðsdómi Reykjavíkur í dag, 23. ágúst.
Þá liggur Grétar Þór einnig undir grun í öðru máli sem enn er í rannsókn hjá Lögreglunni á höfuðborgarsvæðinu. Þar er um að ræða rökstuddan grun um kynferðisbrot hans gegn konu og ofbeldi gagnvart barnungri dóttur hennar, auk þess sem hann á að hafa ítrekað haft samband við konuna og nátengda fjölskyldumeðlimi hennar með símtölum og smáskilaboðum.
Þann 20. ágúst síðastliðinn staðfesti Héraðsdómur Reykjavíkur ákvörðun Lögreglustjórans á höfuðborgarsvæðinu um nálgunarbann á hendur Grétari gagnvart þeim mæðgum, en Grétar hefur áfrýjað þeim úrskurði til Landsréttar. Nálgunarbannið er til sex mánaða.
Í greinargerð Lögreglustjóra kemur fram að kona hafi átta sinnum óskað aðstoðar lögreglu á þriggja mánaða tímabili. Fram kemur að Grétar Þór hafi ítrekað komið að heimili konunnar og meðal annars skemmt hurð á íbúðinni og barið á glugga.
Á tíunda áratugnum, þegar karókí var nýkomið til Íslands, kom Grétar fram sjónvarpsþættinum Dagsljós á RÚV þar sem hann ræddi þessa nýjung og sagði frá aðdáun sinni á Elvis Presley. Fram kom að hann vildi aðeins syngja lög eftir Presley í karókí.
„Maður er giftur og þá hefur maður ekkert áhuga á að pæla í öðru,“ svaraði Grétar Þór þegar hann var spurður hvort hann yrði var við meiri kvenhylli þegar hann tæki lög kóngsins. Hann var síðan spurður hvort hann væri hamingjusamlega giftur en þá stóð á svörum:
„Já og nei. Maður hefur ekki séð konuna sína í heilan mánuð. Maður veit ekkert hvar hún er eða neitt. Hún hvarf bara 6. desember og hefur ekkert sést síðan og ekki einu sinni látið heyra í sér eða neitt.“
