Undarlegt mál kom upp í Flórída fyrir skemmstu þegar borgarstjóri einn var sakaður um að heimta kynlíf fyrir að koma upp hraðahindrunum.

Siðaráð í borginni Lantana hefur tekið málið fyrir og komist að þeirri niðurstöðu að líklegt sé að borgarstjórinn, David Stewart, hafi reynt að fá konu að nafni Catherine Padilla til að stunda mök með honum. Hún hafði leitað til hans með ósk frá íbúum hverfisins sem hún býr í um að setja upp hraðahindranir en borgarstjórnin hafði lofað þeim árið 2015. Þá sagði hún að Stewart hefði lofað henni hindrunum ef hún svæfi hjá honum.

Í tilkynningu frá siðaráðinu síðastliðinn miðvikudag segir að Stewart hafi „misnotað vald sitt til að reyna að fá konuna til að veita honum kynlífsgreiða.“

Stewart neitar sök í málinu en sagði við dagblaðið Daytona Beach News að það væri óviðeigandi að ræða það á þessu stigi.