Héraðsdómur Reykjaness hafi kveðið upp dóm í málinu þann 24. júní síðastliðinn. Í dómnum sé Hafnarfjarðarbæ gert að greiða stefnanda persónuuppbætur aftur í tímann, auk málskostnaðar.Hafnarfjarðarbær hafi áfrýjað dómnum til Landsréttar, en þar sem Landsréttur hafi ákveðið að taka málið ekki fyrir líti Hlíf svo á að um endanlegan dóm sé að ræða. Fram kom hins vegar í tilkynningunni að bærinn hafi þrátt fyrir þetta ákveðið að fara ekki að dómnum varðandi annað starfsfólk í sömu stöðu. Félagið hafi fengið þau svör frá bænum að hann teldi dóminn rangan og ætlaði þess vegna ekki að una honum.

Harka

Hlíf boðaði frekari málarekstur vegna einstaklinga í sömu stöðu og starfsmaðurinn sem dómsmálið snerist um. Formaður félagsins, Eyþór Árnason, sagði að það hlytu að teljast tíðindi að þriðja stærsta sveitarfélag landsins teldi sig ekki þurfa að fylgja leiðsögn dómstóla:

„Annars endurspeglar þetta þá auknu hörku í garð almenns launafólks sem við teljum okkur verða vör við hjá Hafnarfjarðarbæ,“ var haft eftir Eyþóri í tilkynningunni.

Í kjölfarið hefur bæjaryfirvöldum snúist hugur og í fundargerð bæjarráðs segir að það samþykki að dómurinn hafi fordæmisgildi gagnvart öðrum starfsmönnum í sömu stöðu og feli sviðsstjóra stjórnsýslusviðs að ganga frá uppgjöri við viðkomandi starfsmenn.

Fulltrúar Samfylkingarinnar, sem er í minnihluta, lögðu fram bókun á fundinum þar sem segir að upplýst hafi verið í fjölmiðlum að hópur tímavinnu starfsmanna bæjarins, sem séu félagar Hlíf, hafi ekki notið umsaminna kjara:

„Nýlegur úrskurður héraðsdóms í kjaradeilu starfsmanns og Hafnarfjarðarbæjar leiddi í ljós, að vinnuveitandi, Hafnarfjarðarbær, var dæmdur til greiðslu umtalsverðra upphæða. Mikilvægt er að rétt sé rétt og að ógreiddar kjarabætur verði inntar af hendi til starfsfólks bæjarins, skv. niðurstöðu dómsins. Þú deilir ekki við dómarann. Jafnaðarmenn fagna því að um málið sé samstaða í bæjarráði og að frá málinu verði gengið með sanngjörnum og réttmætum hætti.“