Yfirvöld í Íran hafa staðfest að mótmælandinn Erfan Soltani, sem handtekinn var í síðustu viku og dæmdur til dauða örfáum dögum síðar, verði ekki tekinn af lífi.

Þetta gerist í kjölfar þess að Donald Trump Bandaríkjaforseti hótaði hernaðaraðgerðum gegn landinu ef stjórnvöld myndu hefja aftökur á mótmælendum.

Daily Mail greinir frá því að dómsmálaráðuneyti landsins hefði gefið út yfirlýsingu þess efnis að Soltani, sem er 26 ára, hefði verið ákærður fyrir „samráð gegn innra öryggi ríkisins og áróður gegn sitjandi stjórnvöldum“, en dauðarefsing ætti ekki við um slík brot væru þau staðfest fyrir dómi.

Trump sagði í gærkvöldi að hann hefði fengið áreiðanlegar upplýsingar þess efnis að mótmælendur yrðu ekki teknir af lífi.

Soltani, sem á fataverslun, var handtekinn þann 10. janúar síðastliðinn og komið fyrir í hinu alræmda Hesar-fangelsi í Karaj, en talið er að um 20 þúsund fangar afpláni þar dóma sína.

Fjölskylda hans fékk þau skilaboð að hann myndi sæta dauðarefsingu og var yfirvofandi aftaka áætluð í gær, þann 14. janúar. Hótanir Trumps um hernaðaraðgerðir virðast þó hafa borið tilætlaðan árangur.

Talið er að um 3.500 manns hafi látið lífið í mótmælunum í Íran á undanförnum dögum. Trump segist hafa fengið áreiðanlegar upplýsingar þess efnis að ofbeldi gegn mótmælendum veðri hætt og hann muni fylgjast náið með framvindunni næstu daga.

„Við munum fylgjast með þessu og sjá hvernig ferlið verður,“ sagði Bandaríkjaforseti.

Á sama tíma sagði utanríkisráðherra Írans, Abbas Araghchi, við Fox News í gær að „engar hengingar yrðu í dag eða á morgun“. Hann sakaði yfirvöld í Ísrael um að standa á bak við ofbeldið í landinu síðustu daga, en færði þó ekki fram nein sönnunargögn hvað það varðar.