Maður að nafni Ian Ball sem reyndi að ræna Önnu Bretaprinsessu fyrir rúmri hálfri öld síðan segist saklaus í nýju viðtali. Honum var sleppt lausum af geðsjúkrahúsi fyrir sex árum síðan.
Atvikið átti sér stað þann 20. mars árið 1974 þegar Anna prinsessa, systir Karls III núverandi konungs, var á leið til Buckingham hallar ásamt eiginmanni sínum Mark Phillips, þernu, lífverði og ökumanni. Hún var þá 24 ára gömul.
Rolls Royce bíllinn sem þau keyrðu á var þvingaður til að stöðva við götuna Pall Mall af ökumanni sem reyndist vera Ian Ball. Ball steig út úr bíl sínum, tók fram hólk og byrjaði að skjóta. Hann skaut lífvörðinn, ökumanninn og þriðja mann sem reyndi að koma til hjálpar.
Ball gekk að Rolls Royce bílnum og sagði að hann hygðist ræna Önnu prinsessu og heimta lausnargjald upp á 4 milljónir punda fyrir hana. Ball, sem var geðsjúkur, sagðist ekki ætla að eiga peningana sjálfur heldur láta þá rakna til breska heilbrigðiskerfisins.
Hann skipaði Önnu að koma út úr bílnum en því neitaði hún með orðunum: „Ekki fjári líklegt!“ (e. Not Bloody Likely!). Að lokum fór hún þó út úr bílnum ásamt þernu sinni en þá vildi svo vel til að fyrrverandi hnefaleikamaður, Ron Russell að nafni, kom aðvífandi og kýldi Ball og kom prinsessunni af vettvangi.
Ball reyndi að flýja og lenti í öðrum skotbardaga við laganna verði áður en hann var að lokum handsamaður. Enginn lést í mannránstilrauninni en fjórir enduðu á spítala vegna skotsára.
Ian Ball játaði bæði tilraun til mannráns og manndráps í málinu. Hann var hins vegar fundinn ósakhæfur eftir að hafa verið greindur með geðklofa. Var hann vistaður á geðsjúkrahúsi í 45 ár, það er allt til ársins 2019.
„Ég var hræddari en hún,“ segir Ball í viðtali við breska blaðið The Daily Mail, 51 ári eftir hinn dramatíska atburð. Sagðist hann vera saklaus af þeim glæpum sem hann játaði á sig. „Ég er saklaus, heilbrigður maður af því að ég hafði góða ástæðu til þess að trúa að það væri búið að taka púðrið úr kúlunum og að Önnu hefði verið skipt út fyrir aðra stúlku.“
Sagði hann að engin alvara hafi átt að vera að baki mannránstilrauninni. Þetta hafi verið gabb sem hann hefði skipulagt með vini sínum í lögreglunni, Frank að nafni.
„Hugmyndin með því að framkvæma þetta gabb var að vekja athygli á mér svo ég gæti skrifað sjálfsævisögu mína, sem ég bjóst við að fá 10 þúsund pund fyrir í höfundarlaun,“ sagði Ball í viðtalinu sem birtist 1. ágúst síðastliðinn.
Ball sagði það tilgangslaust að biðja mennina fjóra afsökunar. Þá sagði hann að Anna hefði ekki verið vitund hrædd, jafn vel þó hann hafi gripið í hana og ýtt henni í gólf bílsins. Hann þvertók hins vegar fyrir að Anna hefði sagt þessi frægu orð sem áður var vitnað í.
„Hún sagði: „Farðu bara í burtu og enginn mun hugsa meira um þetta“ sem jók tiltrú mína á að þetta væri allt saman gabb,“ sagði Ball. „Á þessum tíma hélt ég að þetta væri ekki Anna prinsessa. Hún líktist ekkert Önnu prinsessu. Persónuleikinn var ekkert eins og Anna prinsessa.“
