Kona sem býr í Fellabæ vaknaði við óskemmtilega reynslu á mánudagsmorgun. Búið var að skera hringlaga gat í rúðu á heimili hennar. Málið er hins vegar mjög dularfullt því að hringurinn er aðeins á ytra glerinu og langt frá opnanlegum fögum.
Í samtali við DV segist konan hafa tilkynnt málið til lögreglunnar. Hún fyllti þar út skýrslu vegna eignatjóns.
„Lögreglumaðurinn sem ég talaði við fannst þetta einmitt mjög undarlegt og það eru allir sem hafa skoðað þetta sagt að það sé augljóst eftir einhvers konar hníf/skera eða eitthvað þannig,“ segir konan.
Ef um var að ræna tilraun til innbrots var þetta ákaflega kauðskt því að gatið var aðeins á ytra gleri rúðunnar og langt frá nokkru opnanlegu fagi. Kæmi nokkuð á óvart að einstaklingur með svona fullkomin verkfæri gerði slík mistök við innbrot.
„Bæði eru engar sprungur og rispur fyrir á glerinu sem líta út eins og verkfærið hafi runnið til. Svo er þetta bara nánast 360° hringur,“ segir konan.
Konan tilkynnti málið einnig í íbúagrúbbu svæðisins og birti mynd af verknaðinum. Varar hún fólk við.
„Það hefur einhver skorið svona snyrtilegt gat á rúðu heima hjá mér í nótt líklega. Í hvaða tilgangi veit ég ekki en ég vil endilega benda fólki á að hafa samband við lögregluna ef það sér eitthvað undarlegt í gangi,“ sagði hún í færslunni. „Ég held satt best að segja að ég þekki engan nógu vel hér fyrir austan til að vera svona illa við mig til að taka þessu persónulega en óþægilegt er þetta,“ segir hún.
Rétt eins og konan og lögreglumaðurinn þá eru aðrir íbúar á svæðinu einnig gáttaðir á þessum skemmdarverkum.
„Þetta er stór undarlegt,“ segir ein kona.
„Skorið eða notaður brenniþráður og síðan er glerið hamrað með hamri inn. Annars væri heill hringlaga glerkubbur fyrir utan. Allt maskað gler milli rúðanna,“ segir önnur kona sem ímyndar sér hvernig þetta hafi verið gert. Í sakamálamyndum sé svona gert til þess að komast að opnanlegum fögum, en eins og áður segir var þetta ekki nálægt neinum slíkum.
