Margir eru sagðir látnir eftir að nemandi hóf skotárás í skóla í borginni Graz í Austurríki í morgun. Kronen Zeitung segir að minnst átta séu látnir og margir til viðbótar særðir.

Lögregla var kölluð á vettvang rétt fyrir klukkan 10 að staðartíma og var mjög mikill viðbúnaður.

Í frétt Kronen Zeitung er haft eftir nemanda að hann hafi heyrt að minnsta kosti tuttugu skothvelli og að árásarmaðurinn, sem mun hafa verið nemandi í skólanum, hafi framið voðaverkið í tveimur skólastofum skólans.

Austurrískir fjölmiðlar greina frá því að árásarmaðurinn sé á meðal hinna látnu. Lögregla hefur biðlað til almennings að halda sig fjarri skólanum meðan að á vinnu á vettvangi stendur.