Skemmdarverk voru unnin í leikskólanum Norðurbergi í Norðurbæ Hafnarfjarðar um helgina. Ekki er langt síðan skemmdarverk voru unnin á regnbogafána í öðrum leikskóla í hverfinu.
Anna Borg Harðardóttir, leikskólastjóri í Norðurbergi, greinir frá þessu í færslu í íbúagrúbbum í Hafnarfirði. Biðlar hún til foreldra að ræða við börnin sín um að ganga um svæðið af virðingu.
„Ég sem leikskólastjóri á Norðurbergi biðla til ykkar, kæru foreldrar, að ræða vel og yfirvegað við börnin ykkar um að ganga um öll svæði með virðingu og ekki síst leikskólalóðirnar sem börnunum þótti eflaust vænt um þegar þau voru lítil,“ segir hún. „Hér voru skemmdarverk unnin um helgina, t.d. var Regnbogafáninn okkar fallegi skorinn niður. Þetta er ekki samfélagið sem við viljum búa í, við viljum kærleik, umburðarlyndi og gleði inn í okkar líf.“
Síðasta haust voru unnin skemmdarverk á lóð leikskólans Víðivöllum í Norðurbæ Hafnarfjarðar. Var regnbogafáninn skorinn niður, hann rifinn og skilinn eftir á lóðinni.
Það mál var tilkynnt til lögreglu og sagði leikskólastjóri að þetta væri ekki aðeins skemmdarverk á eigum skólans heldur vanvirðing við táknmynd umburðarlyndis í samfélaginu.
Regnbogafánar hafa verið skotmörk skemmdarvarga áður. Til dæmis var slíkur fáni skorinn niður við hjúkrunarheimilið Ás í Hveragerði, við Hveragerðiskirkju og við fyrirtækið Rarik á Selfossi.
