Akureyringurinn Ari Rúnarsson, sem er fæddur árið 1990, hefur verið ákærður fyrir frelsissviptingu og rán, auk brots gegn valdstjórninni.
Ákært er vegna atvika frá föstudeginum 3. mars árið 2023, á heimili Ara við Gránufélagsgötu á Akureyri. Er hann sakaður um að hafa svipt mann frelsi og beitt hann ofbeldi og hótunum í því skyni að ná af honum verðmætum.
Í ákæru er Ari sagður hafa boðið brotaþola að gista hjá sér en fljótlega eftir að í íbúðina var komið hélt hann því fram að hann skuldaði óþekktum erlendum mönnum peninga sem hann yrði að borga samstundis. Meinaði hann honum að yfirgefa íbúðina og tók af honum iPhone 14 síma, tvær MacBook fartölvur, Playstation tölvu og tvær Playstation fjarstýringar. Í kjölfarið ógnaði Ari brotaþolanum með hníf, skærum og sprautunálum og skipaði honum að greiða sér eina milljón króna.
Ari gaf brotaþolanum færi á að hafa samband við föður sinn til að útvega peningana sem hann var að kúga út úr honum en neyddi hann til að segja föður sínum að hann sætti hótunum um líkamsmeiðingar frá erlendum mönnum greiddi hann ekki fíkniefnaskuld samstundis og að faðir hans yrði að leggja inn á hann peninga.
Í kjölfarið festi Ari brotaþolann við stól með límbandi og batt fyrir munn hans með límbandi, sló hann og sparkaði í hann. Hann var síðan losaður úr stólnum og látinn sitja á gólfinu þar sem hann fékk vatn úr skál. Loks fékk Ari óþekktan erlendan aðila til að fara inn í íbúðina og innheimta „skuldina“. Segir í ákærunni að brotaþoli hafi ekki losnað úr prísundinni fyrr en átta tíma eftir frelsissviptinguna, þegar lögregla koma á vettvang.
Við handtökuna hótaði Ari lögreglumanni og er hann því einnig ákærður fyrir brot gegn valdstjórninni.
Ari Einarsson á skrautlegan og alvarlegan brotaferil að baki. Árið 2018 gaf alþjóðalögreglan Interpol út handtökuskipun á hann að beiðni íslenskra yfirvalda vegna vopnaðs ráns og líkamsárásar á Akureyri.
Um svipað leyti var hann ákærður fyrir að hafa í félagi við annan karlmann ráðist með hótunum og ofbeldi á mann á Akureyri. Hótuðu þeir að drepa manninn og grafa hann í holu úti í sveit og búta niður kærustu hans, skera hann á háls og stinga hníf upp í heila hans. (Sjá mbl.is).
Nýja málið gegn Ara verður þingfest við Héraðsdóm Norðurlands eystra þann 2. apríl.
