Héraðsdómur Suðurlands hefur dæmt síbrotamann í 9 mánaða fangelsi og til greiðslu miska- og skaðabóta vegna ótal margra brota, sem ákærði játaði að hluta, en hann neitaði þó öðru en var sakfelldur í öllum ákæruliðum.

Í fyrsta ákærulið var maðurinn sakaður um að hafa að næturlagi sumarið 2022 farið inn á þáverandi heimili barnsmóður sinnar með því að brjóta rúðu í húsnæðinu og fara þangað inn, þrátt fyrir ákvörðun lögreglustjóra skömmu áður um að honum væri bannað að koma á eða í námunda við heimilið.

Ákærði neitaði því að hafa farið inn í húsið sagðist eingöngu hafa farið þangað til að sækja fötin sín sem hafi verið í poka utandyra. Hafi hann vitað að barnsmóðir hans var ekki heima og taldi sig því ekki vera að brjóta nálgunarbann. Í lögregluskýrslu sagðist hann „hafa orðið brjálaður og misst stjórn á sér þegar hann hafi séð fötin sín úti í rigningunni en kvaðst ekki muna hvað hafi gerst eftir það. Kvaðst ákærði þó hafa farið inn í […], og það í gegnum rúðu, sem hann kvaðst hafa brotið. Kvaðst hann þó hafa farið strax daginn eftir og talað við leigusalann sem hafi farið og lagað rúðuna.“

Meðal margra annarra brota mannsins var innbrot í Litlu kaffistofuna þar sem hann spennti upp glugga. Bar hann þar við neyðarrétti þar sem bíllinn hans var bensínlaus. Dómari tók þá málsvörn ekki gilda.

Hann var auk þess ákærður fyrir tvo bílaþjófnaði, þjófnað á mótorhjóli og fjölmörg önnur brot, m.a. akstur undir áhrifum vímuefna.

Var hann dæmdur í 9 mánaða fangelsi og þarf að greiða samtals um eina milljón króna í sektir, miska- og skaðabætur og sekt.

Dóminn má lesa hér.