„Ég hélt að Jón Gnarr væri mesti grínistinn á Alþingi en verð greinilega að endurskoða það,“ segir Eiríkur Rögnvaldsson, fyrrverandi prófessor í íslenskri málfræði við Háskóla Íslands, á Facebook-síðu sinni.

Þar gerir Eiríkur umræðu sem átti sér stað á Alþingi í gær um áfasta tappa að umtalsefni. Jón Pétur Zimsen, þingmaður Sjálfstæðisflokksins, var einn af þeim sem tjáðu sig um málið en tilefnið var frumvarp Jóhanns Páls Jóhannssonar um að ljúka innleiðingu um áfasta tappa á drykkjarvörum.

Sitt sýnist hverjum um þetta en Vísir fjallaði um umræðuna um málið á Alþingi og er Jón Pétur einn þeirra sem er mótfallinn innleiðingunni.

„Þetta hefur eyðilagt heilu veislurnar. Að fólk sem kemur prúðklætt inn í eigin veislur að það er orðið útatað í alls konar drykkjum úr plastflöskum með áföstum töppum,“ sagði Jón Pétur meðal annars og viðraði áhyggjur sínar af hugsanlegri ofþornun eldri borgara.

„Þetta varðar lýðheilsu, það augnablik eða sú mínúta sem það tekur að skrúfa tappann á það minnkar svona lífsvilja manns allaveganna um stund. Því þetta er algjörlega óþolandi hegðun á tappanum,“ sagði hann.

Eiríkur var einn þeirra sem tjáði sig um málflutning Jóns Péturs.

„Ég játa fúslega að áfastir tappar pirra mig stundum en lífsvilji minn er samt óskertur. Hverjum dettur eiginlega í hug að drekka skyrdrykk af stút í fínni veislu? Þetta er í alvöru kjánalegasti málflutningur sem ég man eftir á Alþingi. Það vildi ég að ég hefði vandamálin yðar frú Sigríður,“ sagði hann í færslu sinni.