Daníel Gunnarsson, sem var sakfelldur fyrir rúmu ári fyrir morð og limlestingu á líki, hefur fallist á dóm án þess að játa sekt í barnaníðsmáli.

Daníel er 23 ára gamall. Faðir hans er íslenskur en móðir hans er af tékkneskum uppruna. Mæðginin fluttu til borgarinnar Ridgecrest í Kaliforníu þegar Daníel var ungur, en brotin sem hann hefur verið sakfelldur fyrir áttu sér stað í Kern-sýslu Kaliforníu-ríkis.

Sjá einnig: Daníel dæmdur sekur fyrir morð og lim­lestingu á líki – Búist við að hann verði dæmdur til lífstíðarfangelsisvistar

Vísir greinir frá því að Daníel neitaði sök í barnaníðsmálinu og gerði dómsátt við ákæruvaldið um að hann myndi hljóta dóm fyrir þrjá af tólf ákæruliðum málsins. Hann er þannig sakfelldur fyrir lostafulla háttsemi gegn barni undir fjórtán ára aldri. Daníel var einnig ákærður fyrir að þvinga barn undir tíu ára aldri fjórum sinnum til munnmaka eða samneytis, og fyrir fyrir vörslu barnaníðsefnis.

Refsing Daníels verður ákvörðuð í nóvember, en samkvæmt ákærunni áttu brotin sér stað frá árinu 2016 til 2021.

Daníel afplánar 25 ára dóm vegna morðs á skólasystur sinni, Katie Pham, þann 18. maí 2021. Vikurnar fyrir morðið höfðu Katie og Daníel átt í stuttu ástarsambandi en hann neitaði sök í málinu. Lík Pham fannst í bílskúr á heimili stjúpföður Daníels og var Daníel handtekinn á vettvangi. Pham var með fjölda stungu­áverka á lík­ama og höfði sem drógu hana til dauða, en talið er að Daní­el hafi stungið hana með ís­nál. Þá var honum gefið að sök að hafa snert lík Pham með kyn­ferðis­leg­um hætti og var búið að fletta upp skyrtu henn­ar og toga bux­urn­ar niður þegar lög­regla kom að henni lát­inni á dýnu á gólfi bíl­skúrs­ins.

Staðarmiðillinn Bakersfield Californian hefur eftir talskonu saksóknara að Daníel gæti hlotið 24 ára dóm vegna barnaníðsmálsins og myndi afplánun vegna þess dóms hefjast þegar afplánun hans lýkur vegna morðsins á Pham. Daníel gæti því setið inni í nærri 50 ár.