Í gær var greint frá því að aðalmeðferð í máli knattspyrnumannsins Alberts Guðmundssonar færi fram í Héraðsdómi Reykjavíkur á morgun og föstudag. Vísir greindi fyrst frá málinu en athygli vakti að mál knattspyrnumannsins var hvergi að finna í dagskrá dómstólsins sem aðgengileg er á vef dómstólsins. Yfirleitt má finna öll mál á dagskrá dómstólsins en séu þau viðkvæm af einhverjum ástæðum, til að mynda ef um kynferðisbrot er að ræða, þá eru nöfn hlutaðeigandi yfirleitt afmáð.

DV sendi fyrirspurn til Héraðsdóms og spurði út í ástæðu þess að málið var ekki að finna á áðurnefndri dagskrá og hvaða reglur giltu um slíkt. Í skriflegu svari við fyrirspurninni segir Björn L. Bergsson, starfandi dómsstjóri Héraðsdóms Reykjavíkur, að um handvömm hafi verið að ræða.

„Fyrir mistök sem áttu sér stað þegar verið var að bóka fyrirtökutíma málsins í málaskrárkerfi dómstólsins í ágúst láðist að standa þannig að verki að bókunin myndi birtast á vefsvæði dómstólsins. Þetta uppgötvaðist í gærmorgun og var án tafar bætt úr,“ skrifar Björn.

Málið er því komið á dagskrá dómstólsins á netinu en aðalmeðferðin hefst í fyrramálið. Albert er kominn til landsins frá Ítalíu og verður viðstaddur aðalmeðferðina.