Málefni Helga Magnúsar Gunnarssonar vararíkissaksóknara hafa verið mikið í fréttum að undanförnu og valdið hörðum skoðanaskiptum. Þess sér meðal annars stað á Facebook-síðu Jóns Gunnarssonar, þingmanns Sjálfstæðisflokksins og fyrrverandi dómsmálaráðherra. Þar takast á bræðurnir landsfrægu, Gústaf og Brynjar Níelsson.
Jón deilir viðtali sem hann veitti Morgunblaðinu í dag en þar segir hann ummæli Helga ekki vera alvarleg og hefðu ekki dugað til uppsagnar embættismannsins í ráðherratíð hans. Sigríður Friðjónsdóttir ríkissaksóknari hefur áminnt Helga fyrir ummæli hans um innflytjendur og tilkynnt þau til Guðrúnar Hafsteinsdóttur dómsmálaráðherra og lagt til að Helga verði tímabundið vikið úr starfi.
Jón segir í Facebook-færslu sinni:
„Það er mikilvægt að fólkið í landinu sé upplýst um þá alvarlegu stöðu sem þróast hefur í samfélaginu með auknum straumi flóttamanna til landsins. Það verður ekki horft framhjá staðreyndum í þeim málum.
Ég tek undir orð í leiðara Mbl í dag þar sem segir:
Ekki ber að sýta það að framlínufólk réttvísinnar sé kappsamt fyrir hennar hönd eða tjái sig um þær ógnir, sem að henni
steðja. Fáir þekkja þær betur og raunar mættu bæði lögregla og saksóknarar hafa sig meira í frammi að því leyti. Það tíðkast víða í nágrannalöndum án þess að nokkrum detti í hug að réttaröryggi borgaranna sé ógnað, öðru nær.““
Gústaf átelur Jón fyrir að hafa ekki ógilt fyrri áminningu Sigríðar á hendur Helga sem hún veitit honum árið 2022, er Jón var í embætti dómsmálaráðherra. Brynjar blandar sér í umræðuna og reynir að róa bróður sinn, bendir honum á nauðsyn faglegra ferla. Orðaskiptin eru eftirfarandi:
Gústaf: Hér er samviskuspurning Jón: Hvað myndir þú gera í sporum Guðrúnar Hafsteinsdóttur?
Jón: Þú ert greinilega vaknaður en ekki búinn að lesa viðtalið í Mbl. Skoðun mín er skýr.
Gústaf: Þetta las ég í Mogga dagsins klukkan sjö í morgun (5 á þína klukku). Var þér ekki í lófa lagið að gera ríkissaksóknarann afturreka með áminninguna fyrir tveimur árum, en lést ógert? Þetta mál mun mun standa eins og heit kartafla í koki Sjálfstæðisflokksins og almenningur í landinu er búinn að fá nóg af ruglinu. Svo þorir dómsmálaráðherrann ekki að taka á því. Þér væri best að lesa skrif mín um þetta mál á Fésinu.
Brynjar: Taka lyfin, bróðir sæll. Öll svona mál þurfa að fara í farveg áður en ákvörðun er tekin, lögum samkvæmt.
Gústaf: Ég er nú búinn að fá hundleið á þessum „farvegum“ stjórnmálanna, sem gera allt með rassgatinu og tánum. Ekki skorti fé þegar þurfti að bola Haraldi Johennessen úr embætti ríkislögreglustjóra, svo þangað mætti senda kvenkyns afglapa. Og nú sitja menn uppi með óhæfan ríkissaksóknara. Er enginn í forustu Sjálfstæðisflokksins að skilja að almenningur er búinn að fá upp í kok af ráðaleysi stjórnmálanna?
