Tillaga um að óháð úttekt verði gerð á þjónustu Strætó bs. var felld í borgarráði Reykjavíkur í gær. Borgarfulltrúar meirihlutaflokkanna greiddu atkvæði á móti tillögunni, fulltrúi Sósíalistaflokksins sat hjá en fulltrúar Sjálfstæðisflokksins samþykktu tillöguna.
Það var áheyrnarfulltrúi Flokks fólksins í borgarráði, Kolbrún Áslaugar Baldursdóttir, sem lagði tillöguna fram. Í greinargerð með tillögunni segir að lagt sé til að sérstaklega verði könnuð þjónustulund, viðmót og sveigjanleiki í garð notenda Strætó bs. samkvæmt samþykktri þjónustustefnu. Mikilvægt sé að skoða einnig stjórnendur og hæfni þeirra til stjórnunar félagsins og að skoðaðir verði sérstaklega þættir eins og hvort starfsfólk, þar með talið vagnstjórar þekki hlutverk, stefnu og gildi fyrirtækisins.
Í greinargerðinni er tillagan rökstudd með því að fjölmargar kvartanir, sumar hverjar alvarlegar, berist reglulega til Strætó bs. Strætó sé með þjónustustefnu sem virðist vera meira orð á blaði en raunveruleiki, í ljósi fjölda kvartana. Markmið þjónustustefnunnar sé m.a. að skapa traust notenda, sýna áreiðanleika og ábyrgð í verki og sýna viðskiptavinum jákvætt viðmót og kurteisa framkomu sem og að vera vingjarnleg og hjálpfús gagnvart öllum viðskiptavinum. Í þessum efnum sé hins vegar pottur brotinn.
Það sé þess vegna mikilvægt að óháður utanaðkomandi aðili verði fenginn til rannsaka hvers vegna Strætó gangi svo illa að fylgja þjónustustefnunni. Reglulega berist fréttir af slæmri framkomu Strætó gagnvart farþegum og vísað er í nýlegt dæmi um að 10 ára stúlku hafi verið vísað úr strætisvagni á miðri leið að því er virðist að tilefnislausu. Engar skýringar hafi enn verið gefnar á atvikinu.
Líklega er Kolbrún að vísa í mál sem kom upp fyrr í sumar þegar 10 ára stúlku var vísað úr Strætó en engin sérstök ástæða virtist liggja þar að baki en móðir stúlkunnar sagði í samtali við Vísi að hún teldi ekki ólíklegt að húðlitur dóttur hennar hafi eitthvað haft með það að gera.
Eins og áður segir var þessari tillögu um óháða úttekt á þjónustu Strætó hafnað. Fulltrúar meirihlutans rökstuddu synjun sína ekki sérstaklega í bókun og eini fulltrúinn á fundinum sem lagði fram bókun vegna málsins var áðurnefnd Kolbrún Áslaugar Baldursdóttir. Um að tillagan hafi verið felld segir Kolbrún meðal annars í bókun sinni:
„Það er miður því vandi Strætó bs. er umtalsverður og sífellt eru að koma fram í dagsljósið mál, kvartanir sem ekki virðist vera tekið á hjá Strætó. Strætó hefur þjónustustefnu en samt virðist skorta verulega upp á þjónustulund, jákvætt viðmót og sveigjanleika í garð notenda Strætó bs. Mikilvægt er að skoða einnig stjórnendur og hæfni þeirra til stjórnunar fyrirtækisins. Þegar vandi sem þessi er rótgróinn hlýtur að þurfa að skoða stjórnun fyrirtækisins.“
