Landsréttur hefur nú staðfest úrskurð héraðsdóms um að ónafngreindur ofbeldismaður sæti gæsluvarðhaldi til 9. júlí næstkomandi.

Málsatvik eru þau að skömmu fyrir miðnætti 19. mars 2024 barst lögreglu tilkynning í gegnum netspjall frá konu, um að maður væri vopnaður og hótaði að drepa hana. Þegar lögregla kom á vettvang kom konan hlaupandi út úr íbúðinni og sagði hún manninn vera vopnaðan inni í íbúðinni. Lögregla hafði mikinn viðbúnað á staðnum en þegar maðurinn sleit samtali við samningamann lögreglu var farið inn og hann handtekinn.

Konan lýsti misþyrmingum mannsins sem hefði m.a. tekið hana hálstaki og þrengt að þannig að hún gat ekki andað. Þá hafi hann verið með hníf og skotvopn innandyra sem hann hafi hótað sér með. Konan sagðist óttast um líf sitt og finna til ýmissa eymsla.

Lögregla fann á vettvangi eftirlíkingu af skammbyssu og sverð. Einnig voru haldlagðir tveir hnífar.

Fram kemur í úrskurði héraðsdóms að maðurinn eigi langan sakaferil að baki, m.a. vegna ofbeldisbrota.

Á grundvelli þess að talin er hætta á því að hann brjóti aftur af sér á meðan rannsókn á máli hans stendur yfir, sem og að hætta sé á að hann skaði brotaþola í málinu, er maðurinn úrskurðaður í gæsluvarðhald.

Úrskurði Landsréttar og héraðsdóms má lesa hér.