Eldgosið sem hófst á Reykjanesskaga í gær, byrjaði með miklum látum og var mjög aflmikið og hraunrennslið mikið. En nú hefur dregið mjög úr virkni þess og virðist hún nú vera bundin við norðurenda sprungunnar, þar eru nokkur gosop.

Það er þó ekki svo að það gjósi ekki enn. Í vefmyndavélum má sjá að það gýs af nokkru afli.

RÚV hefur eftir náttúruvársérfræðingi hjá Veðurstofunni að hægt hafi á framrás hraunsins við Grindavíkurveg til móts við Svartsengi og einnig við varnargarðana vestan við Grindavík.

Ekki er að sjá að nein sprengivirkni sé til staðar og skjálftavirknin er sáralítil. Gosórói hefur einnig minnkað mikið.

Ekki er talið líklegt að hraunið ná í sjó fram á næstunni og varnargarðar hafa haldið fram að þessu.