Hann gerir færslu tónlistarmannsins Bubba Morthens í gær að umtalsefni á Facebook-síðu sinni en í henni lýsti Bubbi hótunum sem hann hefur fengið eftir að hann lýsti yfir stuðningi við framboð Katrínar Jakobsdóttur í komandi forsetakosningum.
DV sagði frá færslu Bubba en í henni sagði hann að netofbeldið sem beint er gegn stuðningsfólki Katrínar sé komið út fyrir öll velsæmismörk. Í færslunni sagði Bubbi meðal annars:
„Hvað fær fólk til að senda ljót skilaboð, krefja mann um skýringar, hóta manni, ógna manni? Fara inn á heimasíðu manns með dólg, viðhafa orðbragð sem viðkomandi myndi aldrei nota heima hjá sér? Dæmi: Hvað fékkstu borgað fyrir að sleikja hóruna? Ertu að borga fyrir listamannalaunin? Söngstu ekki um hommana, viðbjóðurinn þinn? Ertu að móti þeim núna? Og margt fleira sem er ekki hafandi eftir. Þetta er stöðugt áreiti frá því að ég lýsti yfir stuðningi við framboð Katrínar.“
Sigursteinn tekur undir með Bubba og lýsir áhyggjum sínum af orðræðunni hér á landi. Hann segir:
„Það er satt best að segja fríkað hvernig fólk, sem venjulega er talið málsmetandi, leyfir sér að láta í aðdraganda kosninganna á laugardag. Það er engu líkara en að Ísland sé einræðisríki þar sem misskipting er meiri en nokkurs staðar í veröldinni, kynjamisréttið algjört, réttindi minnihlutahópa gjörsamlega fótum troðin og svo mætti lengi telja. Þessu er í rauninni þveröfugt farið. Misréttið mælist nefnilega hvergi minna í heiminum en á Íslandi þótt auðvitað sé endalaust verkefnum að sinna og hluti að laga. Þó það nú væri!“
Sigursteinn spyr hvað það eigi að þýða að ausa svívirðingum yfir Bubba fyrir það eitt að lýsa sinni lýðræðislegu afstöðu.
„Hvernig væri nú að fólk sýndi lágmarkskurteisi, mannasiði og fagni þeirri lýðræðisveislu sem frjálsar kosningar eru? Það er engin ögurstund í vændum í þessum íslensku kosningum. Það er ekki verið að kjósa forseta Bandaríkjanna heldur persónu sem getur kynnt Ísland á alþjóðavettvangi og séð til þess að starfhæf ríkisstjórn sé í landinu. Burt með skítkastið og sleggjudómana, dónaskapinn og níðið. Þessi þjóð hlýtur að vera betri en þetta!“
