Eldgosið austan við Sýlingafell sem hófst fyrr í dag heldur áfram og hraunflæðið verið meira en í fyrri gosum í þeirri hrinu sem staðið hefur yfir síðan í lok síðasta árs. Eins og staðan er núna virðist stefna í að allir vegir til Grindavíkur lokist vegna hraunflæðis og að þar með verði landleiðin til bæjarins ófær með öllu.
Á Facebook-síðu Vegargerðinnar segir að rétt í þessu hafi Nesvegur farið undir Hraun.
Hraun hafi fyrr í dag runnið yfir Grindavíkurveg norðan við Grindavíkurbæ. Norðurljósavegur sé einnig farinn undir hraun.
Þá flæði hraun í áttina að Suðurstrandarvegi.
Magnús Tumi Guðmundsson prófessor í jarðeðlisfræði segir í samtali við RÚV að hraunrennsli hafi í upphafi gossins verið allt að tvöfalt meira en í síðasta gosi. Styrkur gossins sé enn töluverður en farið sé að draga úr því. Hann vill meina að varnargarðar við Grindavík haldi vel þar sem hraunið sé þunnfljótandi.
Víðir Reynisson sviðstjóri Almannavarna tjáði RÚV að það væri ekki óhugsani að hraun renni inn í Grindavík. Það sé farið að renna utan í varnargarðana á nokkrum stöðum og einnig utan í varnargarðana við Svartsengi.
Ljóst er að Suðurstrandarvegur er nú eini vegurinn til Grindavíkur sem enn er fær en Víðir telur ekki ósennilegt að hraun flæði yfir veginn í kvöld haldi hraunflæði áfram á sama hraða. Gerist það verða allir vegir til Grindavíkur lokaðir.
Eldfjalla- og náttúruvárhópur Suðurlands greinir frá því á Facebook-síðu sinni að annað gosop hafi opnast milli klukkan 17 og 18 við varnarvegginn norðan Grindavíkur. Ekki hafi gosið svona sunnarlega síðan í eldgosinu í janúar, þegar gossprunga opnaðist þvert í gegnum garðinn.
