Landsréttur þyngdi í dag dóm yfir Najeb Mohammad Alhaj Husin sem fundinn var sekur um að hafa, er hann var starfsmaður grunnskóla í bæjarfélagi á Norðurlandi, haft ítrekað samræði við 14 ára stúlku sem var nemandi við skólann. Brotin stóðu yfir í um tvo mánuði og kemur fram í bæði dómi héraðsdóms og Landsréttar að stúlkan glímdi við mikla vanlíðan eftir brotin.

Fyrir Héraðsdómi Norðurlands eystra í fyrra var Najeb sakfelldur fyrir kynferðisbrot sem felst í samræði við barn undir 15 ára aldri. Hann var hins vegar þá sýknaður af ákæru um nauðgun. Landsréttur taldi hins vegar að Najeb hefði með athæfi sínu gerst sekur um nauðgun og var hann því einnig sakfelldur fyrir þann ákærulið.

Brotin voru ýmist framin í húsnæði grunnskólans, í bíl sakborningsins eða á heimili hans. Najeb var einnig sakfelldur fyrir að hafa haft barnaníðsefni í fórum sínum en þar var um að ræða kynferðislega ljósmynd af brotaþolanum.

Najeb hlaut þriggja og hálfs árs fangelsi í héraðsdómi en Landsréttur þyngdi dóminn upp í fimm ár. Hann var jafnframt dæmdur til að greiða stúlkunni 3,5 milljónir króna í miskabætur.

Najeb kom hingað til lands sem hælisleitandi frá Sýrlandi. Hann flutti í bæjarfélagið þar sem hann framdi brotin árið 2009. Hann er giftur konu sem einnig er hælisleitandi. Þess má geta að Najeb var rúmlega þrítugur þegar brotin voru framin en brotaþoli var 14 ára.

Dóminn má lesa hér.