Lögreglan á Suðurlandi staðfesti nú fyrir stuttu að tveir hafi látist í alvarlegu umferðarslysi í morgun á þjóðveginum skammt frá afleggjaranum að Skaftafelli. Tvær bifreiðar sem komu úr gagnstæðum áttum skullu saman.
Í tilkynningunni kemur fram að tveir aðilar, erlendir ferðamenn, hafi verið úrskurðaðir látnir á vettvangi.
Í tilkynningunni kemur fram að fjölmennt lið sjúkraflutningamanna, slökkviliðsmanna, björgunarsveitamanna og lögreglumanna hafi farið á vettvang ásamt tveimur þyrlum Landhelgisgæslunnar. Vinna á vettvangi sé langt komin en rannsókn málsins sé á frumstigi og í höndum lögreglunnar á Suðurlandi. Þjóðvegi 1 hafi verið lokað á meðan aðgerðir hafa staðið yfir, en ekið sé um hjáleið við Skaftafell.
