Hundaræktandi á sextugsaldri var myrtur í Colorado fylki í Bandaríkjunum. Lögreglan hefur gómað mann sem er grunaður um verknaðinn en hundana er hvergi að finna.
Sergio Ferrer heitir maðurinn sem er grunaður um að hafa myrt hundaræktandann Paul Peavey. Lík hins 57 ára ræktanda fannst við sumarhús hans í fjöllunum við Clear Creek í Colorado þann 24. ágúst síðastliðinn.
Tímaritið People greinir frá þessu.
Ferrer, sem er 36 ára, verður að öllum líkindum ákærður fyrir morð af yfirlögðu ráði. En það er talið hafa átt sér stað þegar Ferrer hafi verið að ræna Peavey.
Ferrer mætti fyrir dómara þann 30. ágúst. Var honum tilkynnt að tryggingargjald hans fyrir lausn fram að réttarhöldum væri ein milljón dollara, eða tæplega 140 milljónir króna. Ferrer gaf ekki upp afstöðu sína gagnvart sakarefninu í því þinghaldi.
Ekkert hafði heyrst frá Peavey frá 19. ágúst og tveimur dögum eftir það auglýsti lögreglan í Clear Creek eftir honum. Leitarflokkur fann lík Peavey og var strax ljóst að hann hafði verið skotinn til bana. Réttarmeinafræðingur hefur síðan staðfest það. Sagði hann að Peavey hefði verið myrtur um það leyti sem síðast heyrðist frá honum.
Ferrer var handtekinn um klukkan fjögur síðdegis daginn sem lík Peavey fannst. Að sögn lögreglunnar fannst Ferrer í nokkurra klukkustunda fjarlægð frá staðnum þar sem líkið lá. Lögreglunni grunaði að hann tengist morðinu en hann var þó ekki handtekinn fyrir það heldur vegna handtökuskipunar frá Nebraska fylki. En það var vegna vopnalagabrota og flótta undan réttvísinni.
Að sögn lögreglunnar voru um 10 Doberman hvolpar á heimili Peavey þegar hann hvarf. Ekki er vitað hvar þeir eru niðurkomnir. Lögreglan telur að hvolparnir geti skipt sköpum við að skýra morðið og aðdraganda þess.
Hvolparnir eru örmerktir. Lögreglan telur að þeir gætu hafa verið seldir á samfélagsmiðlum eða öðrum stöðum síðan Peavey var myrtur. Allt bendir til þess að Peavey hafi verið myrtur í hvolparáni en lögreglan hefur þó ekki lýst því yfir.
Í auglýsingu lögreglunnar er fólk sem nýlega keypti Doberman hvolp á miðsvæði Colorado fylkis beðið að athuga hvort hann sé með örmerki eða að hafa samband við lögreglu.
Peavey rak hundaræktunina Elite European Dobermans en einnig var hann með hundaathvarf. Hann vann einnig ýmis störf með hundum, svo sem að fara með björgunarhunda í gönguferðir og að fara með hunda á hjúkrunarheimili til að heimsækja eldra fólk, sannkallaður hundavinur.
