Helgi Björnsson, jöklafræðingur og prófessor emiritus við Jarðvísindastofnun Háskóla Íslands, segir það vera stórhættulegt að bjóða upp á íshellaferðir á sumrin. Helgi segir þetta í samtali við Morgunblaðið í dag en bandarískur ferðamaður lést þegar ísveggur gaf sig í Breiðamerkurjökli og annar slasaðist.

Helgi er okkar helsti fræðimaður um jökla og hann er gagnrýninn á að boðið sé upp á íshellaferðir yfir sumartímann.

Helgi bendir á að íshellar myndist þar sem ár koma undan jökli og göngin stækki stöðugt þegar líður á sumarið.

„Það er hins veg­ar þannig að þegar hætt­ir að renna vatn um þá og komið er haust þá standa þessi göng opin og þá er kannski hægt að fara þarna inn og þannig hafa nú þess­ar ferðir verið til að skoða þessa ís­hella. Til skamms tíma var þetta bara gert á haust­in, í októ­ber eða nóv­em­ber þegar bráðnun er búin og kom­in svona kyrrð yfir þetta og leys­ing­ar bún­ar,“ segir Helgi við Morgunblaðið og bendir á að hellarnir séu stöðugt að breytast yfir sumartímann.

„Þeir verða til frá vori og yfir sum­arið og eru þá stöðugt að breyt­ast og stækka og mikið um að vera í jökl­in­um. Hann er á meiri hreyf­ingu og að ryðjast fram og það get­ur þá verið var­huga­vert að vera að flækj­ast þarna inni í þess­um ís­hell­um,“ segir Helgi.