Evrópa getur ekki varið sig gegn hugsanlegri árás Rússa því ríki álfunnar eru meira og minna varnarlaus. Þetta sagði Vladímír Pútín, Rússlandsforseti, á föstudaginn þegar hann tók þátt í pallborðsumræðum í Sankti Pétursborg í tengslum við efnahagsráðstefnu sem fór fram þar.

„Evrópa ræður ekki yfir aðvörunarkerfi, sem varar snemma við. Á þann hátt er álfan meira eða minna varnarlaus,“ sagði Pútín að sögn BBC.

Ekki liggur fyrir á grunni hvaða upplýsinga Pútín setti þessi ummæli fram.

Hann sagði einnig að Rússland ráði yfir mun fleiri taktískum kjarnorkusprengjum en Evrópuríkin, meira að segja ef Bandaríkin ákveða að flytja fleiri kjarnorkuvopn til Evrópu.

Taktískar kjarnorkusprengjur eru litlar sprengjur sem eru ætlaðar til notkunar á vígvellinum. Slíkar sprengjur hafa aldrei verið notaðar í stríði.

Samkvæmt rússneskum hernaðaráætlunum þá verður beiting kjarnorkuvopna íhuguð ef ráðist er á landið með kjarnorkuvopnum eða öðrum álíka hættulegum vopnum eða ef landið á í hefðbundnum stríðsátökum þar sem tilvist þess er ógnað.

Fyrr í vikunni sagði Pútín að Rússland hafi ekki í hyggju að ráðast á NATÓ-ríki. Það sagði hann á fréttamannafundi fyrir vestræna fréttamenn, þann fyrsta síðan Rússar réðust inn í Úkraínu.

„Hverjum datt þetta í hug? Eruð þið orðnir klikkaðir? Eruð þið jafn heimskir og þetta borð? Þvílíkt bull,“ sagði Pútín þegar hann var spurður hvort slík árás væri hugsanleg.