Andri Snær Magnason, rithöfundur og fyrirlesari, blandar sér í umræðuna um skólakerfið hér á landi og þann vanda sem virðist blasa við drengjum.
Hann skrifaði færslu á Facebook í gær sem vakið hefur talsverða athygli.
„Nú er aftur verið að ræða drengi og skóla og margt sem þarf að gera. Samkvæmt rannsóknum virðist drengjamenning í grunnskólum á Íslandi einkennast af metnaðarleysi og meðalmennsku sem skaðar alveg örugglega þá fáu sem vilja skara framúr í námi,“ segir Andri Snær og bendir á að nýlega hafi verið útskrift í MR þar sem 15 hæstu voru allar stelpur.
„Rót vandans er eflaust ekki einföld, en kannski stendur það í samhengi við skort á góðum fyrirmyndum eða tengingum við vísindasamfélag og atvinnulíf,“ segir Andri sem kveðst eitt sinn hafa spurt hóp af ellefu ára drengjum hvað þeir vildu verða í framtíðinni. Óhætt er að segja að svar þeirra hafi komið honum á óvart.
„Helmingur sagði atvinnumaður í fótbolta, hinir ætluðu að verða youtuberar. Með hverjum æfið þið? spurði ég. Þá voru bara þrír sem æfðu fótbolta. Mér fannst þetta skrítið, ég æfði fótbolta en vissi 100% að ég yrði aldrei atvinnumaður. Enginn sagði arkitekt, pípari, læknir, verkfræðingur,“ segir hann og bætir við innan sviga að youtúberar og atvinnumenn í fótbolta séu flestir glataðar eða óraunhæfar fyrirmyndir.
„Þetta var bara eitt dæmi – ekki alhæfing um kynslóð en mér fannst eitthvað lýsandi í þessu. Eitt flottasta verkefnið sem ég hef séð á samanlagðri grunnskólagöngu barna minna er Legó vélmennakeppnin sem Háskóli Íslands stendur fyrir (Hún heitir reyndar erlendu nafni og því nota ég það ekki.)“
Andri nefnir að keppnin sé annars vegar forritunarkeppni, að láta Lego-vélmenni leysa þraut á stóra sviðinu í Háskólabíó, og hins vegar að leysa samfélagslegt vandamál og kynna lausnina í hliðarsal.
„Verkefnin voru allt frá Sláturhúsi á Hornafirði til lausnar á CO2 vandanum. Allur bekkurinn þarf að vinna saman og skipa sér í hlutverk og þetta varð lykill að góðum bekkjaranda næstu árin. Grunnskólarnir hafa Skrekk, þar sem listrænu krakkarnir skína, þeir hafa skólahreysti og íþróttafélögin þar sem íþróttakrakkar skína og Stóra upplestrarkeppnin er mikilvæg en Legókeppnin er dæmigerður vettvangur fyrir vísindalega þenkjandi og handlagna nemendur og kannski er keppnin ,,strákalegri” en Skrekkur. Bekkurinn græðir á því að einhver sé ,,klár”, tæknifær eða með verkvit (í stað þess að leggja proffann og nördinn í einelti).“
Andri segir að áhugasamir foreldrar hafi þjálfað bekkinn og þarna hafi margir skólar verið af landsbyggðinni, en það hafi komið honum á óvart að aðeins tveir bekkir í Reykjavík hafi tekið þátt í þessari tilteknu keppni árið 2019.
„Ég man þegar dóttir mín hljóp i skólann á sunnudegi á æfingu að ég hugsaði. ,,Hún veit ekki að hún er að læra”. Við höfum nokkuð sterka íþrótta og listmenningu en eigum kannski lengra í land á þessu sviði. Ég held að ,,svarið” við veseni á strákunum sé ekki að skrifa fleiri bækur um fótbolta, (ofuráhersla á bolta og óhóflegt gláp feðra mætti jafnvel rannsaka sem hluta af vandamálinu). Allavega, skólafólk mætti skoða þessa keppni fyrir næsta ár, það er mikilvægt að stækka heimsmynd krakkanna með verkefnum að þessu tagi eða útskýra af hverju þeir kjósa að taka ekki þátt.“
Fjölmargir hafa deilt færslu Andra Snæs og þá hafa margir lagt orð í belg undir færslunni sem má sjá hér að neðan.
