Lögreglan á höfuðborgarsvæðinu varar nú við innbrotafaraldri í heimahúsum. Mælst er til þess að fólk safni upplýsingum um grunsamlegar mannaferðir.
„Undanfarið hefur verið nokkuð um innbrot í heimahús á höfuðborgarsvæðinu og eru þjófarnir einkum á höttunum eftir skartgripum og peningum að því er virðist,“ segir í tilkynningu lögreglunnar. „Vegna þessa er það ítrekað að fólk láti lögreglu vita um grunsamlegar mannaferðir (taki ljósmyndir ef slíkt er mögulegt) og að það skrifi líka hjá sér, t.d. bílnúmer eða jafnvel lýsingar á fólki, ef eitthvað óvenjulegt á sér stað í nánasta umhverfi þess. Myndefni úr öryggismyndavélum er sömuleiðis oft mjög hjálplegt.“
Bent er á að innbrotsþjófar fylgist gjarnan með húsum áður en þeir láti til skarar skríða. Sumir þeirra hringi dyrabjöllum og þykist vera að spyrja eftir einhverjum. Mikilvægt sé að hafa þessa hegðun í huga og vera á varðbergi.
„Munið að það er betra að hringja einu sinni of oft í lögregluna með upplýsingar af þessu tagi en einu sinni of sjaldan,“ segir í tilkynningunni.
Þá minnir lögreglan á mikilvægi þess að ganga tryggilega frá heimilium sínum. Svo sem að loka gluggum og hafa útiljós kveikt, bæði bakatil og að framanverðu.
Einnig er hjálplegt að láta nágrannana vita því nágrannavarsla getur skipt sköpum um að upplýsa um innbrot eða koma í veg fyrir þau. Ekki er mælt með því að auglýsa langferðir á samfélagsmiðlum. Þjófar fylgist með öllum slíkum tilkynningum.
„Upplýsingum má koma á framfæri í síma 444 1000 eða í tölvupósti á netfangið abending@lrh.is Ef óskað er eftir skjótri aðstoð lögreglu vegna yfirstandandi innbrots skal undantekningarlaust hringja í 112.“
