Þann 10. janúar síðastliðinn var þingfest fyrir Héraðsdómi Reykjavíkur mál gegn konu og karli sem héraðssaksóknari hefur ákært fyrir tilraun til stórfellds fíkniefnalagabrots.
Parið er sakað um að hafa reynt að taka við rúmu kílói af kókaíni með styrkleika 62-64%, ætluðu til söludreifingar hér á landi í ágóðaskyni.
Fíkniefnin voru falin í hliðum pappakassa sem innihélt vínilplötur og heyrnatól. Koma kassinn hingað til lands með póstsendingu frá Þýskalandi miðvikudaginn 18. október 2023. Lögregla lagði hald á sendinguna og fjarlægði efnin úr umbúðunum.
Parið átti að fá greiddar 1.000 evrur fyrir að móttaka pakkann, eða um það bil 150 þúsund íslenskar krónur. Þann 24. október fór konan á pósthús við Síðumúla og spurði um pakkann, sem var stílaður á manninn. „Ákærða veitti pakkanum ekki viðtöku heldur sagði starfsmanni að annar aðili kæmi að sækja hann, á meðan stóð ákærði Y fyrir utan pósthúsið en hann fylgdi ákærðu X fast á eftir er hún gekk frá pósthúsinu og sameinuðust þau við Suðurlandsbraut og gengu sem leið lá niður í miðbæ Reykjavíkur,“ segir í ákæru. Þar kemur einnig fram að í kjölfarið á þessu voru bæði handtekin í húsi við Sólvallagötu í Reykjavík.
Héraðssaksóknari krefst þess að bæði konan og maðurinn verði dæmd til refsingar og greiðslu alls sakarkostnaðar. Einnig er krafist upptöku á 1093,38 g af kókaíni.
