Í síðustu viku fannst Vladimir Egorov látinn í garðinum við heimili sitt sem er austan við Moskvu. Hann var félagi í flokki Vladímír Pútíns, Sameinað Rússland, og stuðningsmaður forsetans. Lögreglan segir að hann hafi dottið út um glugga.

Egorov er ekki fyrsti þekkti einstaklingurinn sem hefur látist eftir að Rússar réðust inn í Úkraínu í febrúar 2022. Dauða margra þeirra bar að með dularfullum hætti og eru nokkrir sagðir hafa dottið út um glugga.

Nýlega hylltu þingmenn í rússnesku Dúmunni, þingi Rússlands, Egorov, sem var 46 ára þegar hann lést, fyrir stuðning hans við hernaðinn í Úkraínu.

Lögreglan segir að um óhapp hafi verið að ræða þar sem hann datt út um gluggann og engar vísbendingar séu um að eitthvað glæpsamlegt hafi átt sér stað.

Á Telegram-rásinni Baza er haft eftir heimildarmönnum innan rússnesku leyniþjónustunnar að Egorov „hafi dottið út um glugga á þriðju hæð“.

Miðað við hversu margir þekktir aðilar, aðallega andstæðingar Pútíns, hafa látist við undarlegar kringumstæður síðan Rússar réðust inn í Úkraínu, er ekki furða að margir velti fyrir sér hvernig dauða Egorov bar að og hvort hann hafi verið fallinn í ónáð hjá Pútín.