Jens Stoltenberg, framkvæmdastjóri NATO, skýrði frá þessu á sunnudaginn eftir að hafa fundað með Recep Tayyip Erdogan, Tyrklandsforseta, í Istanbúl.
Finnar og Svíar sóttu um aðild að NATO um miðjan maí á síðasta ári í kjölfar innrásar Rússa í Úkraínu.
Finnar fengu aðild í byrjun apríl eftir að Tyrkir gáfu grænt ljós á aðild þeirra. Þeir hafa hins vegar ekki enn fallist á aðild Svía vegna þess að þeir telja Svía styðja við bakið á kúrdískum hryðjuverkamönnum.
Erdogan hefur einnig gagnrýnt Svía fyrir að framselja ekki fjölda aðila sem Tyrkir telja tengjast herskáum Kúrdum og misheppnaðri valdaránstilraun 2016.
Stoltenberg hefur hvatt Tyrki til að láta af andstöðu sinni við aðildarumsókn Svía og segir að þeir hafi tekið stór skref til að koma til móts við Tyrki.