Í frétt CNN í morgun kemur fram að Xi Jinping, forseti Kína, hafi fyrirskipað æðstu embættismönnum landsins á sviði öryggismála að vera undirbúnir fyrir það versta sem gæti gerst.
Segir í fréttinni að ráðamenn í Kína séu markvisst að auka viðbúnað gagnvart ógnum sem kunni að steðja að bæði innanlands og utan.
Forsetinn lét þau orð falla á fundi þjóðaröryggisnefndar Kínverska kommúnistaflokksins að viðfangsefni sem varði þjóðaröryggi séu orðin flóknari en áður. Hann sagði að Kína þurfi að vera viðbúið verstu mögulegu aðstæðum sem kunni að koma upp í öryggismálum. Sagði forsetinn að líklegt væri að stormar væru framundan.
Fram kemur hjá CNN að þessar áherslur forsetans á hertan viðbúnað komi í framhaldi af auknum áskorunum sem hann og aðrir ráðamenn Kína standi frammi fyrir. Erfiðleikar kínversks efnahagslífs fari vaxandi og ráðamenn líti svo á að fjandskapur í garð Kína, á alþjóðavettvangi, hafi aukist.
Sagði forsetinn í ræðunni að Kína yrði að hraða nútímavæðingu þeirra innviða og búnaðar sem snerta þjóðaröryggi. Hann sagði að beina þyrfti sjónum að því að þetta allt nýttist sem best í beinum átökum.
Samkvæmt CNN hefur forsetinn, síðan hann komst til valda árið 2013, lagt mikla áherslu á þjóðaröryggi og staðið fyrir því að það verði gert miðlægt í öllu sem varðar stjórn kínverska ríkisins.
Hjá forsetanum varðar nánast allt þjóðaröryggi og svo virðist sem að það sé orðið helsta forgangsmál kínverskra stjórnvalda í stað efnahagslegs vaxtar. Auknar húsleitir og rannsóknir sem beinast að erlendum fyrirtækjum sem hafa starfsemi í Kína þykja rökstyðja slíkt mat.
Í áðurnefndri ræðu sagði forsetinn að Kína yrði markvisst að vinna að því að auka öryggi gagnvart umheiminum til að tryggja betur að samkipti við hann hefðu ekki vaxandi ógn í för með sér. Forsetinn sagði að stuðla yrði að samtvinnun efnahagslegrar þróunar og öryggis.