„Þarna er verið að gera úlfalda úr mýflugu, mér þykir leitt að ekki sé farið með rétt mál í þessu og það er verið að eyðileggja daginn fyrir fermingarbörnunum,“ segir Fjölnir Freysson, en hann tengist deilum sem sprottið hafa upp á Tálknafirði í tengslum við fermingarathöfn í Tálknafjarðarkirkju síðastliðinn laugardag.
Ragnar Þór Marinósson heldur því fram að tveir menn hafi hótað því að skrá sig úr þjóðkirkjunni ef faðir hans Marinó myndi þjóna sem meðhjálpari við fermingarathöfn í Tálknafjarðarkirkju síðastliðinn laugardag. Ragnar álasar sóknarprestinum Kristjáni Arasyni yfir því hvernig hann hafi tekið á málunum en hann hafi ekki greint Marinó frá þessum kröfum fyrr en eftir æfingu fyrir fermingarathöfnina sem haldin var daginn áður, hafi þó prestinum verið kunnugt um þetta lengi.
„Það reynir oft á að búa í litlu sveitafélagi. Ég er kominn með upp í kok á að horfa á ýmiskonar andlegt ofbeldi og segja ekkert. Ég vil frekar lenda í leiðindum við að benda á ofbeldi og óréttlæti heldur en að sitja hjá eins og aumingi,“ sagði Ragnar í harðorðum pistli um málið. Kristján sóknarprestur tók fram í viðtali við DV að engum hafi verið meinaður aðgangur að messunni en hann hafi greint meðhjálparanum frá þessum óskum mannanna tveggja og lagt það í hans hendur hvernig brugðist skyldi við.
„Ég er víst forsprakki í þessu máli,“ segir Fjölnir Freysson í viðtali við DV. „Ég hélt að þetta væri ekki stórt mál en það er búið að gera úlfalda úr mýflugu. Það er ekkert hatur á milli manna hér en það er margt sem menn deila um.“ Fjölnir harðneitar því að hann hafi krafist þess að foreldrar Ragnars Þórs yrðu ekki viðstödd athöfnina:
„Það var aldrei farið fram á að Marinó eða konan hans mættu ekki í kirkjuna. En fyrir mína parta fannst mér þægilegra ef annar meðhjálpari gæti leyst hann af hólmi. Ég sagði að fyrir mína parta væri það plús ef hann gæti hugsað sér að stíga til hliðar þennan dag. Það eru fordæmi fyrir því að menn hafa ekki óskað eftir þjónustu hans við jarðarfarir og giftingar en presturinn benti mér á að það væru einkaathafnir en fermingin væri opinber athöfn. En hann sagðist ætla að bera þessa ósk undir Marinó.“
Fjölnir segir að þetta hafi ekki verið krafa heldur ósk og það hefði ekki eyðilagt fyrir honum daginn þó að Marinó hefði verið meðhjálpari. En honum hafi þótt betra, í ljósi gamall deilna, að hann yrði það ekki. Hins vegar hafi þetta mál verið blásið svo upp í meðförum Ragnars Þórs, sonar Marinós, að núna sé búið að eyðileggja minningu fermingarbarnanna um þennan stóra dag sinn.
„Við skulum hafa í huga að þarna voru aðeins fjögur fermingarbörn og við vorum tveir feður sem óskuðum eftir þessu. Eitt barnanna var auk þess aðkomubarn.“
Fjölnir ítrekar að hann hafi ekki verið með neinar hótanir heldur einfaldlega sett fram þá auðmjúku ósk að Marinó myndi stíga til hliðar úr hlutverki sínu sem meðhjálpari þennan dag. Honum þyki mjög leitt hvernig málið hafi verið afbakað í samfélagsmiðlum og frétt DV.
