Guðni Thorlacius Jóhannesson, forseti Íslands, og forsetafrúin Eliza Reid munu dagana 29. maí til 1. júní verða í opinberri heimsókn í Kanada. Í tilkynningu forsetaembættisins kemur fram að þetta sé fyrsta ríkisheimsókn Íslands til Kanada frá árinu 2000. Markmið heimsóknarinnar er sagt vera að styrkja hin margþættu tengsl landanna sem fögnuðu 75 ára afmæli stjórnmálasambands á síðasta ári.
Eins og flestum er kunnugt er forsetafrúin fædd og uppalin í Kanada en hún hefur búið á Íslandi frá árinu 2003. Það kemur ekki fram í tilkynningunni hvort að Eliza og Guðni hyggist nýta tækifærið og heimsækja einhverja ættingja eða vini á meðan heimsókninni stendur.
Í för með forsetahjónunum verður fjölmenn sendinefnd en þar verður fremst í flokki Lilja Alfreðsdóttir, menningar- og viðskiptaráðherra, en auk hennar fara fulltrúar ýmissa fyrirtækja og stofnanna með.
Heimsóknin hefst í Ottawa, höfuðborg Kanada, fæðingarstað forsetafrúarinnar. Þar verður fundað með landstjóranum Mary Simon og forsætisráðherranum Justin Trudeau. Auk þess fundar verður efnt til fundar um varðveislu tungumáls í fámennum málsamfélögum og kynntar aðferðir í notkun máltæknilausna á íslensku. Á enn öðrum fundi verður rætt um lýðheilsu ungmenna.
Í Ottawa verður efnt til bókmenntaviðburðarins „Sögur úr norðri“ en þar mun forsetafrúin ásamt Whit Fraser, eiginmanni landstjórans, ræða við kanadíska rithöfunda um bókmenntaarf þjóðanna.
Frá Ottawa verður haldið til Halifax í Nova Scotia og í kjölfarið St. Johns á Nýfundnalandi og Labrador. Í tilkynningunni segir að fundað verði með fylkisstjórum og ráðherrum og efnt til fjölda viðburða.
Fram kemur að heimsókninni ljúki í Toronto þar sem fundað verði með fylkisstjóra Ontario. Í Toronto muni Íslandsstofa bjóða til íslensks markaðsdags og leiða saman kanadíska fjárfesta og fulltrúa íslensks viðskiptalífs og muni forsetinn ávarpa gestina.