Meðal þeirra refsiaðgerða sem gripið var til var að frysta eigur rússneskra olígarka og fyrirtækja sem og eigur vina Vladímír Pútíns. Bannað var að selja Rússum ýmsar vörur sem er hægt að nota við olíuvinnslu og geimferðir. Ferðahömlur voru settar á Rússa og hömlur voru settar á viðskipti með hlutabréf og skuldabréf.
Á fundi G7-ríkjanna um helgina var ákveðið að grípa til enn frekari refsiaðgerða og ekki er vanþörf á ef tölur um rússneskt efnahagslíf eru skoðaðar. Jakob Ekholdt Christensen, aðalgreinandi og yfirmaður Global Macro Research hjá Danske Bank, sagði í samtali við TV2 að þegar hann skoði rússneskar efnahagstölur þá sé almennt ekki að sjá að refsiaðgerðirnar hafi haft mikil áhrif. „Ef ég vissi ekki að það sé stríð í gangi og að Vesturlönd hafi gripið til refsiaðgerða, þá myndi mér finnast að staða rússnesks efnahagslífs væri góð,“ sagði hann.
Tölurnar benda til að framleiðsla sé að aukast í Rússlandi og að viðskiptajöfnuðurinn sé mikill. Rússar hafa langa reynslu af að sniðganga vestrænar refsiaðgerðir og ná sér í vestrænar vörur í gegnum þriðju lönd, til dæmis Kína og Indland. Vesturlönd hafa beitt Rússa refsiaðgerðum síðan þeir réðust á Krímskaga 2014 og því hafa Rússar haft mörg ár til að laga sig að þeim og læra hvernig er hægt að komast fram hjá þeim eftir krókaleiðum.