Í síðustu viku sögðu æðstu embættismenn í bandaríska varnarmálaráðuneytinu, Pentagon, varnarmálanefnd fulltrúadeildar Bandaríkjaþings að ekki sé að sjá að Úkraína muni geta náð Krím úr höndum Rússa í náinni framtíð.

Politico skýrði frá þessu og að meðal þeirra sem voru á fundinum sé Laura Coope en hún er aðstoðarvarnarmálaráðherra og hefur yfirumsjón með málefnum er tengjast Rússlandi.

Sabrina Singh, talskona Pentagon, sagði í samtali við Politico að ekki verði skýrt frá hvað fór fram á fundinum sem var bak við luktar dyr og ekki verði heldur rætt um kenningar eða vangaveltur um aðgerðir í framtíðinni.

Mark Milley, æðsti yfirmaður Bandaríkjahers, hefur nokkrum sinnum lýst yfir efasemdum um hvort Úkraína geti endurheimt þau landsvæði sem Rússar hafa hertekið og innlimað. Í nóvember sagði hann að ekki væru miklar líkur á að úkraínski herinn muni sigra Rússa á næstunni og hrekji þá frá allri Úkraínu, þar á meðal Krím.

Politcio segist hafa heimildir fyrir að þessi ummæli Milley hafi reitt Volodymyr Zelenskyy, forseta Úkraínu, mjög til reiði sem og ríkisstjórn hans.

Úkraínumenn hafa að undanförnu fengið loforð um skriðdreka og langdræg flugskeyti frá Vesturlöndum en þeir hafa lengið beðið um vopn af þessu tagi.

Talsmenn úkraínska hersins segja mikla þörf fyrir vopn af þessu tagi ef takast á að sigrast á rússneska innrásarhernum. Segja þeir að hrekja þurfi Rússa frá öllum herteknum svæðunum, þar á meðal Krím, allt annað sé óásættanlegt.