Eiginkona kennara sem lést eftir hrekk unglinga hefur biðlað um vægð fyrir þá. Segir hún að hann hefði aldrei viljað að lífum þeirra yrði rústað út af slysi.

Breska blaðið The Independent greinir frá þessu.

Föstudaginn 27. febrúar lést hinn fertugi kennari, Jason Hughes, í hræðilegu slysi í bænum Gainsville í Georgíufylki í Bandaríkjunum.

Höfðu nemendurnir hans í framhaldsskólanum North Hall High School kastað klósettpappírsrúllum yfir heimili hans. En sá hrekkur hefur verið stundaður í mörgum skólum í Bandaríkjunum áratugum saman.

Jason stökk út og elti fimm nemendur sem höfðu kastað rúllunum en hann féll í götuna í þann mund sem þeir voru að keyra í burtu. Lenti hann undir bílnum og lést.

Í kjölfarið voru nemendurnir fimm handteknir og ákærðir fyrir að valda dauða kennara síns.

Eiginkona hans, Laura Hughes, hefur nú stigið fram og beðið um vægð fyrir nemendurna. Segir hún að þetta hafi verið slys og það hefði ekki verið vilji eiginmanns síns að þeir sætu lengi í fangelsi vegna þess.

„Þetta er skelfilegur harmleikur og fjölskylda okkar er staðráðin í að koma í veg fyrir að annar eins harmleikur eigi sér stað, að líf nemendanna verði eyðilagt,“ sagði Laura. „Það myndi ganga gegn því sem Jason helgaði líf sitt, að styrkja framtíð þessara krakka.“

Ökumaður bílsins, hinn 18 ára Jayden Ryan Wallace, hefur verið ákærður fyrir manndráp og gæti átt yfir höfði sér 15 ára fangelsisdóm. Hinir fjórir unglingarnir, Elijah Owens, Aiden Hucks, Ana Katherine Luque og Ariana Cruz eru ákærð fyrir minni afbrot, það er að kasta rusli og fara í óleyfi inn á lóð.