Vignir Vatnar Stefánsson, efnilegasti skákmaður Íslands, hefur fengið boð um að taka þátt í sérstökum skákæfingabúðum undir handleiðslu Magnus Carlsen, sterkasta skákmanni heims, í Noregi. Æfingabúðirnar, sem eru á vegum Offerspil skákklúbbsins sem Carlsen stofnaði sjákfur, fara fram í fyrri hluta mars á þessu ári og auk Carlsen munu nokkrir þekktustu þjálfarar heims sjá um æfingarnar, þar á meðal Peter Heine Nielsen, helsti aðstoðarmaður Carlsen, og indverski stórmeistarinn Ramesh, sem er Um mikinn heiður er að ræða sem segir ýmislegt um hæfileika Vignis Vatnars og orðspor hans í alþjóðalega skáksamfélaginu. Þetta kom fram vikulega útvarpsþættinum Við Skákborðið á Útvarpi Sögu þar sem Vignir Vatnar var gestur ásamt Halldóri Grétari Einarssyni, einn af stofnendum Skákdeildar Breiðabliks þar sem Vignir Vatnar er liðsmaður.
Í þættinum kom fram að æfingabúðirnar fara fram á sama tíma og Íslandsmót skákfélaga, þar sem Vignir Vatnar leiðir lið Skákdeildar Breiðabliks, og því ljóst að kappinn og lið hans þarf að færa ýmsar fórnir. Hann segist þó bjartsýnn á að æfingabúðirnar muni skila sér síðar meir, honum og liðinu til hagsbóta.
„Ég ætla rétt að vona að ég geti lært eitthvað af Carlsen og þeim,“ segir Vignir Vatnar léttur.
Vignir Vatnar, sem er 19 ára gamall, er alþjóðlegur meistari í dag en er hársbreidd frá því að ná stórmeistaratitli. Hann hefur þegar náð tveimur af þremur svokölluðum stórmeistaraáföngum og auk þess rofið 2500 stiga múrinn á alþjóðlegum skákstigum, sem krafa er um. Hann hefur sett sér það markmið að klára titilinn á þessu ári og vinna sig hratt upp heimslistann en hann er í dag númer 992 á heimslistanum.
Hér má hlýða á skemmtilegt spjall við Vignir Vatnar og Halldór Grétar
