Ef Rússar sigra mun sigurreifur rússneskur her stilla sér upp við landamæri NATO og verða mikil hernaðarleg ógn við varnarbandalagið. Fyrsta stóra ógnin í þrjá áratugi. Að mati hugveitunnar getur þetta gerst ef Bandaríkin hætta hernaðarstuðningi við Úkraínu og ef Evrópuríki fylgja í kjölfarið.
Þingmenn Repúblikana hafa að undanförnu komið í veg fyrir nýjar fjárveitingar til Úkraínu og krefjast stefnubreytingar hjá Joe Biden, forseta, hvað varðar gæslu á landamærunum við Mexíkó.
Margir hafa áhyggjur af þverrandi stuðningi Bandaríkjanna við Úkraínu og það dregur ekki úr þeim áhyggjum að forsetakosningar fara fram í Bandaríkjunum á næsta ári. Donald Trump, sem verður væntanlega frambjóðandi Repúblikana, hefur sagt að hann vilji hætta stuðningi við Úkraínu og draga Bandaríkin út úr NATO.
ISW segir að ef svo fari að mjög dragi úr stuðningi Vesturlanda við Úkraínumenn þá geti nokkrar sviðsmyndir blasað við. Bendir hugveitan á að Bandaríkin eigi mikið undir því hvernig stríðið endar, miklu meira en flesta grunar.
„Það er alls ekki útilokað að Rússar leggi alla Úkraínu undir sig ef Bandaríkin hætta öllum hernaðarstuðningi og Evrópa fylgir í kjölfarið. Slík niðurstaða myndi þýða að illa farinn en sigurreifur rússneskur her myndi vera við landamæri NATO, allt frá Svartahafi að heimskautasvæðinu,“ segir í nýrri skýrslu ISW „The High Price of Losing Ukraine“.
Hugveitan bendir á að Úkraínumenn, með aðstoð Vesturlanda, hafi gert út af við tæplega 90% þess rússneska herafla sem réðst inn í landið í febrúar á síðasta ári. En þrátt fyrir þetta mikla mannfall sendi Rússar nýja menn á vígvöllinn og efli iðnað sinn til að bæta upp tap á hergögnum.
Segir ISW að ef Rússar sigra muni rússneski herinn verða bardagareyndur og mun stærri en áður en stríðið hófst. Rússneskt efnahagslíf muni hægt og bítandi jafna sig eftir því sem refsiaðgerðirnar, gegn Rússlandi, myndu óhjákvæmilega renna út í sandinn.
Sky News segir að eftir því sem ISW segi þá verði kostnaðurinn við að leyfa Rússum að leggja Úkraínu undir sig meiri en flestir geta ímyndað sér. Það muni hafa í för með sér að Bandaríkin verði að senda mikinn fjölda hermanna til Austur-Evrópu og hugsanlega muni þau standa frammi fyrir „skelfilegu vali“ á milli þess að vera með bestu flugvélar sínar í Asíu til að vernda Taívan eða að hafa þær í Evrópu til að styðja bandamenn sína gegn ágengum Rússum.
