„Ég sagði að ég teldi að það væru að hluta til skilyrði til neyðarvarnar en farið hefði verið út fyrir þau skilyrði,“ segir Kolbrún Benediktsdóttir, aðstoðarhéraðssakóknari og sækjandi í Ólafsfjarðarmálinu, í stuttu viðtali við DV, rétt eftir að aðalmeðferð í málinu lauk við Héraðsdóms Norðurlands eystra. Kolbrún telur hafið yfir vafa að Steinþór Einarsson hafi orðið Tómasi Waagfjörð að bana með hnífstungu í íbúð á Ólafsfirði aðfaranótt 3. október 2022, hins vegar liggi fyrir að Tómas hafi ráðist á Steinþór sem hafi gripið til varna.
„Lögin heimila þá að farið sé niður fyrir refsilágmarkið og jafnvel að fella refsinguna alveg niður, það var bara það sem ég fór yfir, en lágmarkið er fimm ár [fyrir manndráp – innskot DV], ég tel rétt með hliðsjón af aðstæðum að fara niður fyrir það lágmark og jafnvel að það komi þá til greina að fella refsinguna niður. En það er dómsins að meta það.“
Aðalmeðferð í málinu er nú lokið eftir tveggja daga törn. Ljóst er að saksóknari telur Steinþór eiga sér málsbætur. Kolbrún segir það liggja fyrir með hliðsjón af framburði vitna að Tómas hafi ráðist á Steinþór í aðdraganda þess að hann lést. „Upphafið er Tómas, já,“ segir hún.1
„En ákæruvaldið byggir á því að hann [Steinþór – innskot DV] hafi farið út fyrir leyfileg mörk neyðarvarnar, það hefði verið hægt að bregðast öðruvísi við en hann er svo sannarlega að verjast árás. Það er ástæða til að taka tillit til þess við ákvörðun refsingar.“
Aðspurð sagðist Kolbrún telja að réttarhöldin hafi gengið vel og allt hafi verið upplýst í þeim eins vel og hægt var. Búast má við að dómur falli í málinu fyrir miðjan janúar.