Átök glæpagengja með tilheyrandi miskunnarlausu ofbeldi og blóðbaði er orðinn hluti af hversdeginum hjá frændfólki okkar í Svíþjóð. Þetta hefur að vonum áhrif á landsmenn og fimmti hver Svíi óttast að verða skotinn og drepinn í tengslum við þessi hörðu átök glæpagengjanna.

Þetta eru niðurstöður nýrrar könnunar sem Demoskop gerði fyrir Aftonbladet. Hún sýnir að 35% landsmanna óttast að einhver þeim nákominn lendi í einhverju vegna átakanna.

Ótti fólks er ekki ástæðulaus því sárasaklausir borgarar hafa orðið fyrir barðinu á ofbeldisverkum glæpagengjanna og dæmi eru um að sárasaklaust fólk hafi látist af þeirra völdum.

Karin Nelsson, framkvæmdastjóri Demoskop, sagði í samtali við Aftonbladet að niðurstöðurnar sýni mikla aukning hvað varðar ótta fólks við átökin. Þau hafi staðið yfir lengi og séu engar nýjar fréttir. Þau hafi hins vegar harðnað á síðustu vikum og nú sjáist mikill munur á afstöðu fólks miðað við í mars síðastliðnum.

12 voru drepnir í átökum glæpagengja í september. Meðal þeirra var 13 ára drengur sem tengdist glæpagenginu Foxtrott en það er einn af aðalleikendunum í átökunum.

71 árs blindur maður var skotinn til bana á veitingahúsi í Sandviken þann 21. september í tengslum við þessi átök. Hann hafði engin tengsl við glæpagengin og það hafði 25 ára kona, sem lést í sprengjutilræði, heldur ekki.