Girkin var fundinn sekur af hollenskum dómstól um að hafa staðið á bak við árásina á flug MH17 árið 2014. Vélin, sem var frá Malaysia Airlines, var skotin niður yfir Úkraínu með rússnesku flugskeyti. Þar voru aðskilnaðarsinnar að verki. Hann var dæmdur í ævilangt fangelsi fyrir aðild að málinu. Rússar hafa ekki viljað framselja hann.
En nú virðist stefna í að hann endi í fangelsi en ekki í Hollandi, heldur í Rússlandi. Þetta markar ákveðin tímamót því hann var ósnertanlegur þar til síðasta föstudag.
Það getur varðað allt að 20 ára fangelsi í Rússlandi ef fólk er fundið sekt um „öfgahyggju“. Hafa margir af andstæðingum Vladímír Pútíns einmitt fengið að kenna á þessu ákæruatriði á síðustu árum. Til dæmis hefur þessu ákvæði verið beitt gegn Aleksei Navalny, einum þekktasta andstæðingi Pútíns.
Allt frá innrás Rússa í Úkraínu hefur Girkin verið iðinn við að tjá sig um gang stríðsins á Telegram en hann er talinn meðal harðlínumanna. Hann hefur tekið harða afstöðu gegn óvinum Rússland og hefur skipað sér í hóp áhrifamestu herbloggaranna í Rússlandi.
Á síðustu mánuðum hefur gagnrýni hans í garð Pútíns og sérstaklega yfirstjórnar rússneska hersins orðið sífellt harðari.
Daginn eftir uppreisn Yevgeny Prigozhin og Wagnerhópsins í júní gaf Girkin í skyn að uppreisnin hefði sýnt fram á ráðaleysi Pútíns og að hugsanlega „þyrfti að framselja völdin“. En dropinn, sem fyllti mælinn, kom væntanlega á þriðjudag í síðustu viku þegar Girkin sagði Pútín vera „tapara“ og „misheppnaðan róna“ í færslu á Telegram.
Rússneska dagblaðið RBC segir að handtaka Girkin geti tengst beiðni frá Wagnerhópnum en Girkin er enginn aðdáandi Prigozhin og hefur oft gagnrýnt hann.
Tatiana Stanovaya, sérfræðingur hjá hugveitunni Carnegie Moscow Center, skrifaði á Twitter að handtakan væri „bein afleiðing af uppreisn Prigozhin“ í lok júní. Hún gaf í skyn að handtakan geti bent til að hreinsun sé hafin í röðum rússneskra þjóðernissinna sem hafi fram að þessu fengið að gagnrýna stríðsreksturinn nánast óátalið á sama tíma og frjálslyndir og andstæðingar stríðsins hafa verið fangelsaðir í hrönnum.
