Eftir niðurskurð áratugum saman undirbýr NATO stórhuga varnaráætlun sem miðar að því að verjast árás Rússa. Víglínan nær frá Norðurskautinu til Svartahafsins sem gerir að verkum að möguleikar Rússar eru nær óendanlegir og þá um leið gríðarleg áskorun að verjast.

Á leiðtogafundi aðildarríkja NATO, sem fór fram í Vilnius í vikunni, var stórhuga varnaráætlun samþykkt. Áætlunin telur mörg þúsund blaðsíður og útskýrir í smáatriðum hvernig á að verjast rússneskri árás.

Það er stríðið í Úkraínu sem veldur því að NATO endurlífgar sameiginlegar varnir sínar en sameiginlegar varnaráætlanir hurfu af sjónarsviðinu í kjölfar hruns Sovétríkjanna og Varsjárbandalagsins.

„Við erum sannfærð um að Rússar munu endurreisa (her sinn að stríðinu í Úkraínu loknu, innsk. blaðamanns). Þess vegna byggjast áætlanirnar ekki á núverandi ástandi rússneska hersins, heldur á ástandi rússneska hersins áður en hann réðst inn í Úkraínu,“ sagði Rob Bauer, aðmíráll og yfirmaður hernaðarnefndar NATO, um áætlunina.

Hann dró enga dul á að áætluninni hefur verið flýtt um 18 mánuði vegna þeirrar alvarlegu stöðu sem er uppi. Það mun þó taka aðildarríkin mörg ár að ná að uppfylla markmið áætlunarinnar.