Úkraínumenn færast nú nær því að fá F-16 orustuþotur frá vestrænum bandalagsríkjum sínum. Fyrir helgi var tilkynnt að Bretar, Hollendingar, Belgir og Danir séu reiðubúnir til að annast þjálfun úkraínskra flugmanna á þessa tegund véla. Joe Biden, Bandaríkjaforseti, styður þessa þjálfunaráætlun og tilkynnti á fundi G7 um helgina að Bandaríkin muni ekki setja sig á móti því að vestræn ríki láti Úkraínumönnum F-16 vélar í té.

Ekki er hægt að skilja þetta öðruvísi en svo að það styttist í að þeir fái F-16 orustuþotur til umráða.

Anders Puck Nielsen, hernaðarsérfræðingur við Danska varnarmálaskólann, sagði í samtali við TV2 að tilgangurinn með að láta Úkraínumenn fá F-16 vélar sé að gera þeim kleift að ná yfirráðum í lofti yfir Úkraínu.

Með þeim geti þeir skotið rússneskar stýriflaugar niður og flogið með fram víglínunni og þannig gert rússneskum orustuþotum, sem eru á flugi Rússlandsmegin við víglínuna, erfitt fyrir.

Ef Úkraínumenn fá F-16 vélar munu strangar reglur verða settar um notkun þeirra. Þeir munu eingöngu mega nota þær yfir úkraínsku landsvæði. Þeir hafa þróað sín eigin vopn sem þeir geta notað í Rússlandi en vestræn vopn mega þeir ekki nota þar, aðeins á úkraínsku landsvæði.

Nielsen sagði að það muni svo sannarlega skipta miklu máli fyrir Úkraínumenn ef þeir fá F-16 og þá ekki síst ef þeir fá mörg hundruð slíkar vélar en mikið er til af þeim.