Þann 12. júní næstkomandi verður fyrirtaka í Héraðsdómi Reykjavíkur í máli manns sem sakaður er um þrjú ofbeldisbrot gegn lögreglumönnum.

Samkvæmt ákæru héraðssaksóknara átti fyrsta brotið sér stað aðfaranótt laugardagsins 15. febrúar árið 2020, inni í íbúð. Hinn ákærði sló þar rannsóknarlögreglumann, sem var við skyldustörf í íbúðinni, nokkrum sinnum í andlitið, meðal annars með krepptum hnefa. Hlaut rannsóknarlögreglumaðurinn 5 sm marblett yfir hægra kinnbeini, 2 sm mar við vinstra munnvik og eymsli og tognun í vinstri axlargrind og herðavöðvum.

Næsta brot átti sér stað 10. september 2022, í lögreglubíl á leið á lögreglustöðina að Hverfisgötu. Er maðurinn sakaður um að hafa tvívegis hótað lögreglumanni lífláti.

Þriðja brotið var 13. janúar á þessu ári, í fangaklefa í lögreglustöðinni að Hverfisgötu. Hótaði maðurinn þar varðstjóra, sem var við skyldustörf, lífláti.

Brotin eru talin varða við 106. grein almennra hegningarlaga. Þar segir í fyrstu málsgrein:

Hver, sem ræðst með ofbeldi eða hótunum um ofbeldi á opinberan starfsmann, þegar hann er að gegna skyldustarfi sínu eða út af því, og eins hver sá, sem á sama hátt leitast við að hindra framkvæmd slíks starfa eða neyða starfsmanninn til þess að framkvæma einhverja athöfn í embætti sínu eða sýslan, skal sæta … ¹⁾ fangelsi allt að 6 árum. [Ef brot samkvæmt þessari málsgrein beinist að opinberum starfsmanni, sem að lögum hefur heimild til líkamlegrar valdbeitingar, má beita fangelsi allt að 8 árum.] ²⁾ [Beita má sektum, ef brot er smáfellt.] 

Þó að þungar refsingar geti legið við brotum af þessu tagi eru refsingar í slíkum málum þó yfirleitt mun lægri en hámarksrefsingar sem lög leyfa.