Í morgun (12. maí) var maður sakfelldur í Héraðsdómi Reykjaness fyrir að flytja inn til landsins með flugi tæplega tvö kíló af metamfetamíni með 77-80% styrkleika.

Maðurinn gekkst við brotinu og sýndi frá upphafi samstarfsvilja í rannsókn lögreglu. Var það virt honum til refsilækkunar. Til refsihækkunar horfði hins vegar að hann var eigandi hinna haldlögðu fíkniefna og flutti þau til landsins til söludreifingar í ágóðaskyni.

Maðurinn var dæmdur í þriggja ára fangelsi en öll refsingin er skilorðsbundinn. Í dómi héraðsdóms segir um þetta segir að alla jafna kæmi ekki til álita að skilorðsbinda refsinguna í tilviki sem þessu en horfa verði til þess að mikill dráttur hafi orðið á málinu. Afbrotið var framið sumarið 2019 en núna ber maðurinn ábyrgð á uppeldi tveggja barna, er í fastri vinnu og fær hin bestu meðmæli í skriflegu vottorði frá vinnuveitanda. Segir þar að hann sé heiðarlegur og duglegur.

Um skilborðsbindingu refsingarinnar segir ennfremur í dómnum:

„Að öllu jöfnu kæmi ekki til álita að skilorðsbinda þá refsingu. Þegar hins vegar er litið til þess mikla dráttar sem orðið hefur á rannsókn máls og útgáfu ákæru, sem ákærða verður ekki kennt um, sem og þess að ákærði virðist hafa snúið við blaðinu; er kominn í fasta vinnu og ber ábyrgð á uppeldi tveggja barna, þykir eins og hér stendur sérstaklega á og með vísan til nefndra mannréttindaákvæða mega ákveða að fresta fullnustu dæmdrar refsingar þannig að hún falli niður að liðnum fimm árum frá dómsuppsögu haldi ákærði almennt skilorð 57. gr. almennra hegningarlaga.“